江若琳跨過低潮向前衝
江若琳入行剛剛六個年頭，曾拍過多部電影、劇集和推出唱片，在同期出道的新人中脫穎而出。人前風光但卻背着不少鮮為人知的辛酸。看盡圈內圈外人指指點點、受過冷嘲熱諷和白鴿眼，緋聞和負面新聞亦未把江若琳擊退，反而令她咬實牙關，一步一步向前進。
經驗難得
江若琳當年誤打誤撞入娛樂圈發展，在這六年間得到不少工作機會之餘，更從中看到不少人和事，因而豐富她的人生經歷。江若琳認為機會難得，並感激公司栽培。
今年係我剛剛踏入娛樂圈第六個年頭，時間過得好快，比我想像中快。我入娛樂圈係一個機遇下促成，寰宇公司畀好多機會我，由拍戲、出唱片、拍劇、到內地發展，令我好感恩。過程中可以學到好多東西。我常常打過比喻，在娛樂圈一年，等於外間十年，你看到的人和事、必定比你同年齡層的外人多，這種經驗好難得到其他人明白。我好慶幸和開心得到公司的栽培，令我有今時今日的成績。今天學到的東西不是用金錢可以來衡量，這些應該叫做人生經歷。
歌影兩忙
熱愛唱歌的江若琳曾被外界視其歌唱事業是玩票性質，難免令她感到灰心，更曾向公司提出放棄。除在樂壇發展外，江若琳亦用心在影壇發展，她坦言會認真對待每一個機會。
公司簽我成為合約藝人後，經過三年時間訓練才加入娛樂圈發展。我好記得最初公司幫我出唱片，我用咗好多心機去唱和配合公司製作，由於我公司以拍電影為主，我嘅歌唱事業竟被外間覺得我係玩票性質，亦曾試過畀人話我玩玩吓，當我聽到外間的反應，真係好心灰。直到某年樂壇頒獎禮，因為我公司得我一個歌手，其他歌手可以同自己公司歌手們一齊坐，但自己就好似「搭枱」咁，感覺好難受。我曾經同公司講不如唔好再唱歌嘞，因我覺得公司同我一齊努力、付出咗咁多，但得來嘅反應不成正比，我覺得好對唔住公司。
入行至今我拍過不少電影，前期大部分都係一些「柴娃娃」的群戲居多。我會認為《高舉．愛》才是我第一部主演的電影，之前嗰啲都係一個訓練階段，《高》片係一個考試，將我過往學到嘅發揮出來。拍攝前期我要增肥、練舉重，角色有好多內心戲需要時間去揣摩，我花咗好多心機去做。我唔敢話我做到好好，但我會繼續認真對待每一個機會。
對抗緋聞
要數最深刻的事，江若琳坦言當年與老闆林小明傳緋聞一事令她情緒大受影響，更曾在工作期間受盡冷嘲熱諷，令她感委屈。而江若琳認為只要自己清白，不需理會別人的說話，最緊要做好本分。
入行咁多年經歷過好多緋聞，全部都好假。你問我回顧咁多年來最深刻的一單新聞，我可以話係傳我同老闆之間嘅緋聞。我唔介意再講，因為根本唔係事實。時間終於證明到我嘅清白，但係當年事件鬧得太熱烘烘，好多人都誤信。
曾經試過喺一個商場騷，我準備上台同一班Dancers勁歌熱舞，正當喺後台等出場期間，有人喺外面拍打屏風，講好多難聽說話，當中有句叫我「收皮」，我當時覺得好委屈，點解啲人咁睇我？我當時情緒好受影響，好想喊。跳舞導師同我講既然無做過，做乜要為呢啲閒言閒語影響正常工作，我明白到只有自己先可以幫到自己，口在別人處，我控制唔到，只要努力工作證明畀大家睇，我行出嚟嘅每一步，都係辛辛苦苦靠自己的。
渴望拍拖
入行六年經歷不少事情，江若琳表示有得有失，令她可惜的是損失與家人和朋友相處的時間，而且她更加羨慕朋友們可以無顧慮地拍拖，但渴望愛情的她卻大嘆冇時間談戀愛！
入行以來的每一件事都被我視為工作的動力，只要咬着牙關捱得過去，翌日又是美好一天。過去因工作關係難免會損失與家人、朋友相處的時間，最長試過成年不在香港生活，試過回家一日後又要再飛，有機會在香港，我會爭取時間陪家人和朋友。
至於與朋友去旅行、拍拖更是奢侈品。有次同朋友聚會，發現很多朋友都一雙一對拖手出街，我好羨慕他們不用避忌。問我想唔想拍拖？試問邊個女仔不想呢？但請問有哪一位願意你的女朋友經常不在香港，感情是需要培養出來，沒有時間去培養又怎去發展一段感情呢？
筆錄：影視組 口述：江若琳