雨僑醜女大作戰
「美容達人」雨僑將於鄭中基主演的新片《猛龍特囧》中首次擔正女主角，她在片中還撇下靚樣以醜女造型示人。
撞牆又撞柱
日前雨僑為影片試造型，戴上千度遠視鏡、短襪配鮮粉紅涼鞋，傻氣十足，她笑言：「呢個造型我覺得都幾醜樣，仲營造到好蠢嘅效果，我喺呢套戲入面，會係個好蠢嘅女仔，經常會撞到柱同牆。試造型嗰日，我已經感受到撞牆撞柱嘅痛，因為我戴上嗰副千度遠視眼鏡，睇嘢真係好矇同冇距離感，搞到係咁撞，真係要練定鐵頭功！」
射槍練體能
為扮醜女，雨僑事前都有做定功課，參考了林嘉欣在《我要做Model》中扮醜女的演出來偷師。對於首次擔正女主角，會否大感壓力？雨僑說：「唔會，因為拍喜劇，氣氛都好輕鬆，唔覺得有壓力，反而因為戲入面都有啲打戲，就要練一練體能，之後都會去學射槍。」鄭中基是搞笑能手，可會擔心自己忍不到笑？雨僑說：「呢樣就真係最擔心，亦係最大挑戰，所以都諗定好多方法甚至『偏方』去克服，有人話咬脷會忍到笑，如果我想笑嘅時候，都會試吓。」
文：影視組