東東hyper晒臂 當城城冇到
久未在港露面的陳曉東昨日出席活動，心情非常興奮，自爆幾層樓揸手，忘形得在身形fit爆的郭富城面前班門弄斧，不斷「晒臂」搶風頭。不過城城亦不甘示弱，隨即出口術表示有意將「四大天王」合體兼搬上大銀幕，輕而易舉地搶回視線！
郭富城、陳曉東、蔡卓妍等昨日一同現身電台活動，烈日當空下，身為主禮嘉賓的城城被安排在台上就座，即使汗流浹背，城城亦十分識笑keep住笑容。而在台邊等上台的東東顯然非常hyper，不但無視城城，更不斷扯高衫袖大晒麒麟臂，愈晒愈興奮狂擺甫士。不過見慣大場面的城城未有面露不悅，果然，城城一開金口便成功搶回視線。
四大天王拍電影
電台高層張文新表示當年是他一手撮合「四大天王」。事後，問城城可有機會讓「四大天王」再度同台演出？他說：「對上一次同台應該係5年前，相信一定再有機會，但形式未知。（一齊拍戲？）其實我諗緊劇本，或者邀請三位客串吓，我會做埋導演，不過真係拍都冇咁快。」問到打算投資多少？他笑言：「睇吓邊個老闆唔等錢使、唔怕蝕、夠大膽啦！」
物業遍布中港台
東東被爆在台灣買豪宅，他亦風騷承認：「畀你哋報晒啦！但兩年後先至收樓，3,600呎左右啦。（買咗幾錢？）億幾台幣囉。」他指在台灣置業，是為了圓媽媽心願，問到婚後與媽媽同住，豈不能過二人世界？他即大口氣地說：「咁買多間囉！」他又言在香港與內地均有物業：「上海間屋畀老竇霸咗，北京層樓收緊租，香港都有。」
文：音樂組