薛凱琪減壓透底置裝

近日忙於灌錄新碟的薛凱琪（Fiona），早幾日在錄音期間，突然感到雙耳劇痛，要漏夜到醫院睇急症，經初部診斷，懷疑耳朵受到細菌感染而影響聽覺，隨即被下令暫停錄音、跳舞等會影響耳仔的工作。

日前下午4時許，身穿白色連身背心衫褲的Fiona，與助手等人現身灣仔星街一間時裝店睇衫，未幾她便挑選了一條淺色連身長裙，隨即拼上身埋鏡照，兩名店員在旁熱情招呼。由於Fiona身穿的連身衫褲衣料較薄，當她稍為微微彎身曲腳，其雷絲邊的打底褲即透了出來，密實中帶點性感。

原本細心揀衫的Fiona，突然發現門外有記者，即主動行近門口，並搞笑地探頭出來，依起棚牙笑晒跟記者打招呼，之後又回去繼續睇衫，但逛完一輪，最終卻揀不到心頭好，然後齊齊到附近街頭，乘七人車由司機接載離開。

身穿薄衣的Fiona不慎透打底褲。	Fiona發現記者後即搞笑地探頭打招呼。	Fiona睇中一條連身長裙後，立即拼上身照鏡。

方大同慰問

另外，Fiona前日出席飲食頒獎禮，因早前受耳患困擾，提到病況如何？她說：「我左耳戴咗耳塞，依家聽嘢比平時大聲5陪，高音仲犀利。（點解？）未知咩事，依家食緊藥，醫生話可能細菌感染，亦可能腫瘤壓住耳仔神經，但呢個機會好微，稍後會照腦。（影響工作？）暫時做啲唔使靠耳嘅工作，例如填詞、作曲等。（承受到嗎？）好彩有信仰，相信主會幫到我。（怕唔怕抑鬱症發作？）唔驚，我依家變得好堅強，即使聽唔到，個心好咪得囉！」

問到緋聞男友房祖名及方大同有否慰問？她說：「大同有同我聯絡安慰我，而祖名就唔知佢喺邊。」此外，Fiona昨日在微博上載一張與王菀之嘴對嘴的合照，並向壽星女王菀之送上生日祝福。

文、攝：追蹤組