子珊生日「糕」興子華拒送吻
今日34歲牛一的徐子珊要於工作中度過，一班新劇演員昨日趁放飯時間，靜雞雞為壽星女準備蛋糕送驚喜，令子珊喜出望外，她笑言被劇組人員欺騙提早到場，但也大感窩心，不過在旁的子華就拒絕獻吻。
徐子珊、黃子華、陳敏之等昨日於某商場為劇集《My盛Lady》開工，拍攝時撞正中午時間，吸引不少學生妹前來圍觀，而今日踏入34歲的子珊，獲子華、敏之、王君馨等送驚喜，突然捧出生日蛋糕兼唱生日歌，令壽星女忍不住尖叫。
被騙好窩心
身為拍檔的子華，雖然站於子珊旁邊，但面對被要求獻吻，子華卻不肯就範，不過壽星女仍然情緒高漲，她謂：「真係好驚喜，呢個係我今年第一個生日蛋糕，唔怪之得劇組要我咁早嚟，原來係呃我嘅，真係冇諗過，所以好窩心（正日點過？）都要開工，同屋企人之前趁父親節一次過慶祝埋，今年都唔會點大事慶祝，都係同朋友食吓飯囉！（生日願望？）身體健康，希望套劇受歡迎啦！因為今次係我第一次拍喜劇。」
差錯腳撞瘀
而與子珊飾演好姊妹的敏之，則揚言任壽星女揀禮物，更笑謂：「頭先特登同其他演員夾埋，諗住畀個驚喜子珊。」談到日前拍攝吊威吔場面時，原定落地時跌落塌塌米，沒料差錯腳撞到木梯，結果導致美腿添瘀傷，對於該劇演員一而再受傷，問到是否需要再拜神，敏之謂：「呢次係我自己唔小心啫！同埋小意外，醫生都唔使睇！」陳敏之有份主演的《熟男有惑》前日首播，最高收視30點，成績相當不俗！
文：影視組