蘇杏璇昨日離世，不少圈中人都大感愕然及惋惜！
與蘇杏璇於2012年齊奪金像獎最佳男、女配角獎的盧海鵬：「半年前同璇姐去杜琪峯嘅派對，知佢身體唔好，仲瘦咗好多。（你開騷有冇諗住叫佢嚟睇？）都唔想打擾佢！嘿，有糖尿病真係麻煩啲。」
第一期訓練班同學甘國亮：「近幾年冇聯絡，之前做金像獎評審，《奪命金》攞獎，啲人仲誤會係因為同學。（聽到呢個消息會覺得傷心同突然？）唔會，人到咁上下年紀都會預咗，反而要睇下自己想做啲乜嘢，盡量去做，而唔係保住條命。人生應該要抱咁樣嘅態度，佢信佛，相信佢都會係咁諗。」
同期訓練班出身的許紹雄：「收到消息，自己好少聯絡舊同學，最近都無見過佢，一直都知佢有糖尿病，加上有腫瘤，係麻煩啲。」
演藝人協會秘書長陳芷菁：「演藝人協會依家聯絡緊璇姐嘅屋企人，如果有需要，演藝人協會會全力協助。璇姐係一個好nice嘅人，好難過。」
曾與蘇杏璇合作電影《奪命金》的何韻詩表示：「璇姐係演藝界不可多得嘅好演員，可以跟佢喺《奪命金》一片合作係我嘅榮幸，我永遠懷念佢！」