娜姐擘髀下體抽筋
兩代扮嘢王詹瑞文和盧海鵬即將開騷，兩人昨日在綵排時先表演兩王托一后，夾手夾腳托起嘉賓周秀娜擺出擘腿甫士，搞到身為女神的娜姐大喊幾乎抽筋，但反被鵬哥寸爆她少用下體。
詹瑞文和盧海鵬昨日聯同嘉賓周秀娜，為本月14及15日舉行的兩場《詹瑞文盧海鵬紅館奇幻扮嘢大典》綵排，期間娜姐向兩位大師送上禮物，其中送給鵬哥的黃色正方形西瓜代表金磚，而生果又有「生生猛猛」的意思，祝願鵬哥40年輝煌演藝生涯繼續精彩，而20粒心形士多啤梨則寓意詹sir入行20年保持開開心心。娜姐更親手餵兩位大師食士多啤梨，鵬哥和詹sir就錫娜姐面珠回禮，更合力托起娜姐做出高難度動作。
跳辣舞開金口
詹sir受訪時大爆演出時娜姐會做出更多高難度動作，更有個人表演環節，與三名男舞蹈員跳辣身舞，娜姐又自爆會開金口，她坦言很少唱歌，怕舞蹈員聽到其歌聲會硬晒軚。
娜姐又笑言，被兩位大師抱起時雙腳幾乎抽筋，鵬哥即抽水說：「佢少用下體。」娜姐回應說：「係平時淨係郁上半身，好少要咁伸直隻腳。」鵬哥卻乘勝追擊：「死人先要伸直腳啫。」
鵬哥怕近女色
鵬哥托起娜姐時有點避忌，問他是否不敢近女色？他笑說：「年紀大要離開呢啲嘢，（驚被扭耳仔？）我耳仔好硬，冇人敢扭，除咗我老母，但佢死咗。」詹sir說他們將化身熱爆全球的騎馬舞大叔PSY，鵬哥接着說：「詹瑞文扮PSY，咁就認真high！」
文：音樂組
攝：樊愛慈