麥玲玲預告 陳嘉桓老公靚仔
陳嘉桓與麥玲玲來自不同層面的兩個女人，但一見面就滔滔不絕無所不談。麥玲玲向陳嘉桓分享與丈夫相處心得，並預測陳嘉桓未來丈夫高大靚仔兼背景不俗，但虛心勸導她不要做黐身的女人。
陳：陳嘉桓
麥：麥玲玲
為減肥學打泰拳
麥：點解你可以咁瘦？其實你有無肥過？
陳：我入行前都係baby fato架。好彩入行前學功夫，可以保持運動量先修身。食物方面我就好鍾意食米粉，試過一星期只食米粉。而返內地拍戲，我會特別叫只得菜同飯嘅飯盒，因為我唔食啲肉，唔想浪費。
麥：我都試過為咗減肥而去學人打泰拳，第一堂上咗十五分鐘已經無晒氣又無力，點知師傅就同我講「WARM UP完嘞，可以正式上堂。」我話「唔係呀？」跟住我改用跑步減肥，覺得比較方便。依家每日可以跑到六公里，閒時都會跳健康舞。
陳：師傅你皮膚咁好，係咪成日都要做facialo架？
麥：我無o架，只係化妝前做paper mask。以前我乜護理都唔做o架，但依家點都要做少少skin care，補吓濕都要。我成世人都未做過facial，我超無耐性，覺得瞓喺度乜都唔做好嘥時間。其實早睡早起，生活規律最重要，不過做藝人就難啲。
陳：係呀，以前我塗補濕都覺得好『立』，入行後成日都要化妝，咁知道一定要護膚。防曬我都係呢兩年先用，人哋話一白遮三醜嘛，曬到咁黑，對個人運程都唔係咁好啦。
麥：咁又未必每個人曬黑咗都會影響運程喎，好似古天樂咁初出道時係無咁黑嘅，但曬黑咗就開始走紅嘞。因為佢本身利「土」，係適宜曬黑少少嘅。咦，乜原來你臉有粒癦，做乜唔脫咗去？
陳：因為我兩邊臉都有一小粒。
麥：你粒癦喺顴骨，有少少會影響感情運o架。可能要同人爭，脫咗佢好少少喎。
陳：我覺得女仔脫癦係為貪靚，所以我又無乜留意。
三十歲有真桃花
麥：你入咗娛樂圈幾多年？
陳：差唔多四年，我十六歲入行。師傅，我應該電影、電視還是歌唱事業有利？
麥：吓，你咁細個o架咋？你有無改過名，等我幫你算吓.....你做電影好啲，你條命屬土，但水太多。水多對於女仔嚟講會靚啲，但你唔夠土、條命弱，千祈唔好太瘦呀，你要多番少少肉。你大量要火，啲紅、橙、綠色，你受得起o架，你要暖番條命。水適合往外發展。
陳：內地算唔算？
麥：離開自己出世嘅地方，香港以外嘅地方，出面打番入香港會好啲。
陳：係呀，我上年都有去法國、泰國、 日本和內地工作。
麥：咁走嚟走去適合你。
陳：師傅，我感情運點呀？
麥：咁你條命真係凍啲嘅，你最好去熱嘅地方發展。呢十年你慢慢嚟啦，你結婚運係三十歲先有真桃花。你咁後生，唔緊要。
天蠍座佔有欲強
陳：師傅咁你幾時結緍o架？
麥：我93-94年結婚，我同丈夫唔係一見鍾情嗰隻，係從相處到了解先拍拖再陪養感情，我覺得咁樣好啲。你就唔使急啦咁後生。講埋你聽你嫁得幾好，老公家底唔錯o架，你三十歲後識啲男仔，無論背景、家庭狀況都唔錯！
陳：咁依家唔拍拖住？
麥：依家嗰啲唔得啦，三十歲前嚟嘅桃花你都唔使諗嘞，只得傷心兩個字，唔使太認真。
陳：會係外國人定本地？
麥：你丈夫好靚仔、好高大。你唔使一定要搵外地人，但年紀上都唔好揀大你好多嘅，大一至八年都夾到你。
陳：我自己係天蠍座，佔有欲好強。唔止拍拖，對身邊人和朋友都可能會。如果拍拖嘅話都想得到對方重視。
麥：呢個世代都好難o架嘞，我同你相反。我覺得最重要個男人有無良心，你點管點睇實佢都無用。要做啲嘢行轉背都得啦，使幾多時間吖。呢啲嘢，做人要自動自覺，兩個人相處空間都好重要，兩方面都要有自己空間和朋友。我就比較鍾意自由，同老公睇戲都可以喺唔同戲院睇唔同電影。去日本可以分開行，約番個時間集合食個飯咁，咁大家都可以做到自己鍾意做嘅事。
陳：明白晒，我會好好學習人與人之間相處，多謝師傅指點。
談愛現真性情
陳嘉桓愛飲檸茶、麥玲玲獨愛咖啡，一冷一熱不同口味，卻造就了兩位不同年齡層旳女士談不盡的話題。談未來事麥玲玲朗朗上口，而談化妝修身，陳嘉桓重奪「發球權」。在麥玲玲講解如何做一百分女友時，陳嘉桓即變得溫柔，細心聆聽師傅教路，證明每個剛強硬朗的女子，談到愛情事總會現出真性情。
採訪：影視組
場地：Table 18 @ apm