鄭兆良國際高飛
歷盡香港時裝界興衰20年的著名時裝設計師鄭兆良（Barney），一切就由成為改衫styling開始，一步一步成為設計師，以至登上《福布斯》2010年「全球時尚界二十五華人」之一，Barney摒棄做成衣，決意攻高級訂造服，讓他的設計飛越國際，難怪他形容時裝帶給他一個眼界大開的領域。
一切由卿卿開始
香港著名時裝設計師鄭兆良（Barney）熱愛時裝，六歲已立志做時裝設計師，他喜歡以不同形式的時裝設計，如crossover，當中包括鞋履、汽車、牛仔品牌等以至設計大公司的制服及替名人做婚紗，今時今日他會問：「穿起鄭兆良的服裝你想令人想起甚麼？」
在時裝界打滾了20年的Barney笑言自己是「中坑」，他今天的成就由一個小小的故事開始，Barney回想起當年做styling的日子：「當年登台好興着易除嘅服裝，好似由長裙變短裙，再變迷你裙，葉玉卿（卿卿）當年登台搵我改衫，因為佢着嘅衫要方便除下，所以會用魔術貼，但魔術貼整得唔係好靚容易外露，佢就嚟搵我改衫，之後我就提議下次幫佢設計晚裝，佢就開始搵我做。」Barney幫名人做訂造服就由這裏開始。
周汶錡結婚晚裝
Barney一步一步開展自己的事業，到現在做高級訂造服，一件都近20萬，他的客人有名人、明星，亦有低調的一群，既然做得訂造服自然就要有一顆「竊聽」別人的心：「我見到客人會問個問題，『着住鄭兆良嘅衫你想令人諗到乜？』背後隱含年輕？出位？高貴嘅意思。」談到這裏Barney數數手指，直言自己過去其實客人不算多：「我做過嘅客唔多過八百個，只係有好多人着完件衫被人大讚，之後就會嚟搵我，我試過三代同堂都同時搵我做衫，一代一代咁流傳。」Barney抱住一種特別的心態去設計服裝：「不是因為你着了鄭兆良做的衫而美，而是你自己着得美麗。」他亦不時為名人訂造婚紗及晚裝，如楊紫瓊曾在第73屆奧斯卡頒獎禮穿上Barney設計的黑色水晶虎紋旗袍，艷壓全場；而2012年周汶錡結婚亦找Barney設計晚裝，他表示知道對方愛喱士的設計，所以設計以喱士為主及以紅色好意頭為意念；而徐子淇、張曼玉等都是他的捧場客。
找得Barney設計訂造服的客人都非富則貴，出現的地方都是非同凡響，他說：「有時客人會因為去私人party而搵我去做一件好誇張嘅衫，但佢哋希望低調，好似客人去白金漢宮受勳加冕，或者同王子食飯，就會嚟搵我做訂造服，呢個係我嘅榮幸。」當然凡事都有第一次，他亦試過有第一次幫襯的客人不熟悉他而意見多多，他耐心的解釋，得到客人明白，最後製成品得到客人讚賞，客人不但再次幫襯，更成為朋友。
員工成為搶手貨
每個設計師都會被問靈感來源，對於經驗尚淺的設計師或者會有靈感乾枯的時候，但對於老練的Barney，他的靈感似是無窮無盡，任何在他眼內出現的畫面都可以幻化成他的創作，難怪他直言從來沒有試過冇靈感：「如果冇靈感就根本唔會做設計師，轉咗行啦！平時靈感都基於同客溝通，可以係一個展覽而帶出靈感，線條可以幻化，任何嘢都可以係靈感來源，設計就好似一塊吸水海綿，吸收人哋嘅好處，而我就只會睇靚嘢。」Barney吸收別人的長處，亦都會放出正面信息，培育新人。
公司遇臥底抄襲
時裝界一向都是「長江後浪推前浪」，Barney現時積極培育新人，免得時裝界缺乏人才，導致青黃不接。經常請新人的Barney覺得做前輩要教育新人：「我連實習生都畀錢佢增值學英文，幫到人就幫。我試過有員工被挖角，出多三倍人工挖佢走，冇辦法，我畀唔到，佢跳槽。而且好多人叫臥底嚟睇我做乜，之後返去照做，好多地方請我員工都係因為佢喺我度做過，叻先會有人挖。」面對員工被挖，他反而覺得好榮幸，因為行內人覺得曾做過鄭兆良公司的人都是精英。Barney謙虛的態度正正是新人應該學習的地方，他登上《福布斯》2010年「全球時尚界二十五華人」之一，他乘機為自己平反：「我冇搵任何公關幫手，可能係自己好好彩，好多人都支持我，所以先有今日嘅成就。」Barney靠自己的努力而贏得口碑及支持。
防彈布料做衫
行李箱品牌TUMI邀請了Barney以防彈布料設計男女裝訂造服，他直言等布料都等了一個月，而設計都好天馬行空，感覺似在實驗室做設計。以防彈布料設計出如高級訂造服一樣，要實用及多元化，骨位內有袋、暗格、直條似蘇格蘭感覺，縱橫交錯，他希望做到一件發揮功能效果的訂造服。
Profile
鄭兆良畢業於加拿大滑鐵盧大學（藝術學士），曾於倫敦皇家藝術學院攻讀紡織設計及於巴黎帕爾森設計學院讀歐洲服裝史，1993年參加香港貿易發展局主辦的青年大賽，奪得針織類別最佳設計大獎，其後成立個人的工作室Yenrabi Ltd.，設計高級訂造服。
文：李詠林
攝：黎志輝