爆瘡Sharon 寸嘴搶風頭
上年節目《盛女愛作戰》成為全城熱話，今年無綫再接再厲推出真人配對騷《求愛大作戰》，主角由盛女變為盛男。節目昨日在尖沙咀舉行記者會，讓8男5女參加者率先見人，要數最突出，必定是28歲處男Thomas和無外在美又無內在美爆瘡的「爛面Sharon」，風頭有望超越之前的盛女Florence！
無綫最新真人騷《求愛大作戰》，昨日在尖沙咀舉行記者會，現場所見，一眾盛男外貌平平無奇，有低調富二代Justin、動作多多稱是英國紳士的「英國囂屎Vincent」，又有打扮娘爆的「守貞教徒Winter」，但最突出的，可謂是28歲處男Thomas！他先在台上無厘頭辯稱：「未食過豬肉，但見過豬扒！」受訪時他又口窒窒反問記者如何定義處男：「睇你點界定啦！自己用手嗰啲算唔算？」坦白又露骨！不過Thomas承認後悔自己太誠實：「唔應該講，好尷尬！」另外，貌似足球員陳肇麒（陳七）的Rocky，節目未出街已有不少粉絲舉牌撐場，而他亦大騷腹肌娛賓！
白淨俏Whitney標青
另一邊廂，5位單身女士質素都令人大跌眼鏡，當中以白淨俏Whitney較為養眼，不過最令人過目不忘的，肯定是滿面暗瘡的「爛面Sharon」，受訪時她囂張寸嘴，死撐是參與節目後才開始爆瘡：「之前唔係咁！（畀啲男生嚇親？）係啦，少咗時間休息。（皮膚差啲男仔唔揀你？）因為咁唔要我，係佢哋嘅損失。」
對於參加者質素參差，非戲劇製作總監余詠珊解釋：「始終呢個唔係選美，每個人性格都有特色。」她亦指會盡量避免過火內容。此外，《盛女愛作戰》的Mandy、Suki和男友Zion都有到場為他們打氣。
文：影視組