苟姑娘自我催眠變修長
齊靠戀情新聞升呢的苟芸慧及吳千語前晚出席活動時肥瘦立見，苟姑娘的身形明顯比纖瘦的千語龐大得多，腳瓜足足等於千語兩條。品牌高層更贈興讚苟姑娘「修長」，引來台下一陣笑聲，難得苟姑娘仍表現大方，並死撐已開始變瘦。
兩位近期hit爆的女星苟芸慧與吳千語前晚與陳展鵬及王君馨出席Lexus IS車系活動，豐腴的苟姑娘拍住瘦削的千語BB合照，更覺苟姑娘身形猶如巨人。席間品牌高層竟表示苟姑娘與新車線條一樣「修長」，引來台下一陣笑聲，事後問到會否感尷尬？苟姑娘說：「冇尷尬，每人線條都唔一樣，出嚟效果好就ok，大家笑係開心事。」
手臂小腿圓潤
現場見苟芸慧手臂及小腿仍圓潤，問是否又增磅？她說剛與梁烈唯到台灣拍微電影，每日都會跑步，身邊的人都指她瘦了：「可能大家成日見到我，所以唔覺，減肥需要多啲時間。」
提到開快車，苟姑娘笑言喜歡在合法情況下開快車釋放自己，問駕駛技術好的男生會否加分？她說：「安全第一。（緋聞男友郭富城呢？）最緊要架車好，生命最緊要。」談及城城舊愛熊黛林已有追求者，苟姑娘自爆仍乏人問津，但並不心急：「冇男友好失敗咩？我依家好開心，放開咗好多，希望帶正能量畀大家。」
千語唔嗲林峯
千語說尚未有車牌，但很享受坐快車，問男友林峯駕駛技術如何？她說：「冇坐過喎，都好少機會見。」她說男友於內地拍劇，自己一直留港工作，沒時間探班，只靠「正常聯絡」維繫感情，並淡然表示不會撒嬌：「冇咩特別，大家都忙，都明白。」千語說父親節未必能與兩位爸爸慶祝，至於送甚麼禮物給林父？她說：「好難買，希望有機會食餐飯，咁最實際。」
文：影視組