陳家樂導演上身 揼本學藝
藝人陳家樂最近迷上拍片放上網，他指早前替某導演拍戲，對方除給予酬金外，又教他拍片，家樂笑道：「佢見我好有興趣，就『呃』咗我買部機，我將拍戲嗰啲錢投資晒落啲器材度，花咗成兩萬幾蚊。」語畢在旁的王梓軒嘲笑他：「究竟你嫌部機貴，定係嫌導演畀得少錢你？」
問二人有否考慮合作？家樂說：「可能拍佢又彈又唱。（唔拍裸露激情戲？）咁要交畀佢（王梓軒）啦，我未拍過裸露戲，好難，自導自演我亦未有咁嘅能力，但我知佢識打詠春，睇吓有冇武術嘅嘢搵佢拍啦。」王梓軒表示跟冼國林師傅習武半年左右，對方已告知他要出賽打擂台，但因他之前做演唱會，所以延遲了。