唯唯凍僵鳥德斌贏部署
無綫藝員梁烈唯及黃德斌早前分別到北極及撒哈拉沙漠跑馬拉松，唯唯在低溫下喪跑一度虛脫險死，更試過小解時凍親「小唯」，認真牙煙。體能甚佳的德斌則在酷熱天氣攀山越谷，賴有周詳計劃，表現不遜專業跑手！
體能甚Fit的藝員梁烈唯及黃德斌早前到極冷的北極及酷熱的撒哈拉沙漠完成馬拉松賽事，挑戰人體極限，過程極度艱辛，將在節目《極地狂奔》中播出。
正式開跑，當日唯唯要完成九圈共42公里的賽程，因不懂得留力，至第八圈體力迅速下降又抽筋：「我仲好雄心咁補給站都唔入，諗住快啲完成，但累積嘅攰同凍傷突然出晒嚟，開始出現幻聽，覺得會死，諗好多負面嘢，又諗起家人，最後邊跑邊行跑完呢個圈，當時受訪都話決定唔再跑o架喇！」全身無力及呆滯的唯唯，休息了個多小時後逐漸恢復體力，在導演及監製陪同下咬緊牙關完成整個賽事，過程有血有淚。
在零下廿多度的北極生活，每一小節都很重要，唯唯曾因着錯襪險要切除腳趾。當談到如廁問題，他則尷尬地說：「當地人好急先去，因為唔想『嗰度』暴露空氣太耐，但我開頭唔知，等咗廿幾秒都未屙得出，開始覺得痛，即刻收埋『佢』暖番吓先，如果因為咁要切就慘喇！」
冇諗過放棄
至於德斌每日在攝氏逾40度的天氣下完成不同難度、共200多公里的賽事，與來自50多個國家的選手齊齊跑，賽前每人帶備一批脫水糧出發，「自生自滅」計算每日進食多少：「有啲人開頭食多咗，要周圍問人幾百幾百咁借，係講緊卡路里，唔係講食乜，我就計得好準嘅。」因事前有妥善計劃及每日Check實身體狀況，故德斌沒有太大危險，順利完成跑程：「最難忘係第二日要游繩爬高山，落嘅時候地勢唔平坦，望極都望唔到終點，原來仲有好多山谷，呢個幾考體力！另一日要跑70公里，又要夜跑，都好困難，但我冇諗過放棄！」
經歷難忘之旅，兩人均表示甚有得着，唯唯學懂堅持及吃素，問到會否加速結婚計劃？他說：「唔關事呀！不嬲都珍惜眼前人。」德斌則更覺人類渺小，凡事會順應天命。
文：立影
攝：黎志輝
梁烈唯髮型：KEL＠HH Salon