苗僑偉：我識返轉頭
熱愛運動的苗僑偉（三哥），因拍新劇愛上踩單車，三哥全副武裝上陣顯示雄風，但閒時與三嫂戚美珍踩車郊遊，卻不愛自顧追風，偶爾愛與三嫂「漫遊」，並以踩車比喻生活伴侶同行態度，一方即使踩得多遠，總要識回頭與老婆同步，難怪三哥三嫂多年感情不變。
苗僑偉在無綫新劇《好心作怪》演一名沽名釣譽的商人，後來因為一次意外，換了演醫生的黃宗澤之心臟，因而承接了對方的踏實、善良性格，三哥稱這些內心戲從心出發，是他演戲以來的一項大考驗。
咀Niki玩重口味
三哥與周麗淇（Niki）和黃宗澤在戲中的三角關係亦很重口味，Niki有場戲與宗澤咀，劇情講她當時有幻覺諗起三哥，拍攝時Niki要連咀兩男，三哥笑說：「大家交換晒口水！」
拍《好》劇三哥過足戲癮，亦因此劇愛上踩單車。原本是高球好手的三哥，最近斥萬多元買了單車，與老婆戚美珍踩車郊遊，他說：「好過喺屋企玩跑步機，夜晚踩單車好舒服，最近引埋三嫂陪我一齊踩。（重拾當年拍拖feel？）冇喎，大家好專注。雖然三嫂踩得慢，我踩得快，但就算踩得幾遠，我都會踩返轉頭陪三嫂『漫遊』。人生嘅伴侶條路就係咁行，男人行得快啲，只要識行返轉頭就得，正如我一樣，由始至終我都識得行返轉頭。」
期望拍戲有獎攞
對《好》劇收視，三哥坦言沒壓力，憑新穎題材他有信心取得28、29點收視，並笑言他在劇中的衰人角色，是他從演以來最乞人憎。三哥續說：「好期待好角色出現，要型要chok演得太多，想演啲人性化角色。希望喺電影方面發揮，依家拍劇保持狀態。（攞獎？）言之過早，但做演員會朝呢個方向，攞獎係目標。」
文：影視組
攝：司徒國榮