秋官欣宜 sweet攬錫交足戲
鄭少秋與愛女鄭欣宜昨日首次以父女檔出席活動吸金，期間表現風騷的秋官多次大讚欣宜在肥姐的紀念騷上表現出色，又指她的勁歌熱舞夠hot，相反欣宜卻大爆秋官唔識發短訊，怕女兒不知道自己是誰。
秋官及欣宜昨日齊齊出席PCCW活動，首次以父女檔接job搵真銀，難怪兩人表現風騷，秋官全程傍實愛女，不斷大晒父女情，又攬又錫表現sweet爆。
擔心愛女吊威吔
雖然秋官對欣宜照顧有加，但欣宜卻大爆秋官不懂發短訊，笑指他發短訊時均會加上下款，深怕女兒不知道是自己是誰。問到二人合體的出騷價會否特別高時，他們即默契十足地表示是商業秘密，秋官則自爆曾找欣宜同到內地登台，不過因撞期而告吹。
早前因到內地工作而未能出席肥姐紀念騷的秋官，對欣宜的表現有讚冇彈，又坦言擔心欣宜吊威吔會受傷，講到興起時更忘記回答記者提問，不斷大讚愛女夠hot：「一早就擔心佢（欣宜），因為知佢要吊高表演。我知舞台上好危險，有安全帶都會提佢check清楚個扣。（欣宜表現如何？）見到佢跳啲hot舞，知佢好辛苦，不過都好叻喎！（睇咗個騷邊part？）睇佢嗰part先！」不過當問到騷上播出女兒兒時脹爆的跳舞片段，欣宜即高呼：「真係人生一大污點！」場面惹笑。
文、攝：專案組