苟芸慧摷減價貨慳妹混吉
藝人苟芸慧（苟姑娘）雖然被指一登「城」門身價十倍，荷包連同身形都幾級暴「脹」，但原來苟姑娘仍死守慳妹性格，昨日身穿緊身褲行商場，並專揀特價平衫為台灣之旅裝身，即使前日當地發生大地震，亦震不走苟姑娘的濕平癮！
苟芸慧自與天王郭富城鬧出緋聞後，實行「城」勢吸金，《好報》日前更踢爆她被冠以「新城嫂」之名後，身價、工作量及知名度統統直線上升，最和味的是由本來三萬元的出騷價，狂升至十萬元的「天王嫂」價。雖然吸金冇停手，但始終「新城嫂」之位未坐得穩陣，所以苟姑娘也不敢亂fing血汗錢，即使行街濕平亦要錫住荷包。
「肉腿」要扣分
昨午約三時，苟姑娘以一身「黑look」單拖現身大型商場，她到髮型屋扮靚整頭後，雖然上半身外套扣少兩粒鈕，事業線乍現有分加，但她的下半身身材則大大扣分！曾揚言想撇甩「肥苟」之名的她未完成修身「大業」，穿上緊身褲的她一雙「肉」腿乍現，認真趕客，一心想變「靚苟」的她．似乎仍需繼續努力。
將赴台灣開工
苟姑娘到一家時裝店邊用耳機講電話邊揀靚衫，慳得一蚊得一蚊的她更專攻「SALE」特價架上的女裝衫，雖然有拎上手向店員問價，可是最終亦冇斬獲空手而回。苟姑娘出門發現記者時，更表情多多，手指指又揮揮手，態度友善的她表示剛才為工作試造型，並說：「我啱啱去試造型，依家準備返屋企，之後會去台灣拍嘢。」台灣前日發生黎克特制六點三級地震，似乎苟姑娘無懼當地受餘震影響，一於勇闖險境。
文：音樂組