周秀娜D Cup蚱蜢惡鬥詹Sir
盧海鵬與詹瑞文在扮嘢騷玩轉圈中人，今次「中招」的是找來「正版」劉以達組成經典的「撻成一塊」，再拖性感上陣的宅男女神周秀娜變「D Cup蔡一傑」，娜姐更自薦扮老虎乸，相信觀眾笑到標眼水之餘，又會睇到流口水。
兩代扮嘢高手盧海鵬及詹瑞文昨日與劉以達為6月14及15日舉行的《詹瑞文盧海鵬紅館奇幻扮嘢大典》進行綵排及拍攝短片，三人分別穿上特別設計的潮Tee，並即場Jam歌《壽頭記》。達哥更趁機送上唱片贈兩位主人家，詹Sir即場啜爆對方面珠回禮，當達哥在吻鵬哥時，鵬哥扮摑對方並說：「你抱好喇，唔好錫。」而達哥竟忘記鵬哥名字寫法，認真失威。
鵬哥向女神挑機
達哥屆時會在扮嘢騷與鵬哥重演惡搞達明一派的「撻成一塊」，達哥先大笠高帽說：「我細個喺電視見到鵬哥扮『撻成一塊』，真係笑『乸』到我碌地，落到街好多人識我。」怎料鵬哥笑笑口說：「有時扮嘢呢，唔係好紅都扮到紅。」對於被鵬哥踩唔紅？達哥笑言：「佢係講緊當年，唔係依家。」問到扮演黃耀明的鵬哥會否扮攬仔？他打趣說：「佢嗰時都未攬仔（當年未出櫃）。」
最意想不到的是，女神周秀娜亦加入扮嘢行列，她將會聯同詹Sir及鵬哥扮演山寨版草蜢－「蚱蜢」，詹Sir預告娜姐會以性感造型登場：「佢會扮蔡一傑，可能會着番套白色透視裝，總之同咗服裝設計師講最Sexy嗰件留畀佢。」問到兩人會否頂得順娜姐的惹火身材？鵬哥竟挑機鬥身材：「頂咩，我身材夠好囉！」
而娜姐在電話訪問中，亦大讚兩位前輩可開門派教扮嘢：「我好開心可以學嘢，我扮咩都冇所謂，知道佢哋其中主題係少年Pi，我扮隻老虎乸都得o架。」
文：音樂組