方平愧對女兒 全場一齊喊
資深電影人方平與影后鮑起靜的女兒方之樺前晚出嫁，圈中不少一雙一對如方中信與莫可欣、錢嘉樂與湯盈盈、曹永廉與姜依蘭、爾冬陞（小寶）夫婦等均畀面到賀，不過整晚卻「淚」點連連，首先一對新人發表感謝父母詞時，已令方平與鮑姐眼濕濕，及後兩杯酒落肚的方平，亦走上台講出一番心底話。
薛凱琪感動落淚
沒料甫一踏上台，方平已忍不住流淚，小寶即大叫「忍住呀」，台下嘉賓們亦相繼起哄，方平停頓片刻便開腔，表示當年陪同臨盆在即的鮑姐到醫院，惟女兒當時「未出得世」，結果他便離開醫院返家，他謂：「我冇見證到個女出世，之後同太太工作都忙，個女一直畀人湊，到佢４歲先接返嚟，我真係好自責，阿女，爸爸對你唔住，冇陪住你成長……所以請在座有小朋友嘅家長，好好珍惜子女成長過程，因為好珍貴！」令台下嘉賓無不動容，薛凱琪、盈盈、可欣更攞住紙巾抹眼淚，就連男子漢方中信及小寶亦眼濕濕。
及後，方平落台後即與鮑姐及女兒相擁，場面感人！而睇住之樺成長的方中信，亦以長輩身份上台講話的方中信可謂「喊住講」，期間方中信女兒迦晴走上台攬實其腿部不放，還催促他落台，場面惹笑！
文：影視組