Rihanna紅得有理

要「紅」得起，一啲都唔簡單。紅色好蝦人着，容易變得娘，最緊要整體造型及懂得配搭。星級形象指導Ricky Kwok（郭慶彬）力讚劉嘉玲與章子怡穿出星味，能艷壓全場，而美國女歌手Rihanna則紅得有壓場感。

火紅色同佢健康膚色配成一絕，拖尾裙襬好有壓場感，紅唇配棕色髮型，令佢更有女人味，今次女人味感覺好fresh。

紅色令佢皮膚好白滑，掛頸款式好易着到膊橫，hip位貼身設計都易着肥，但佢一啲都唔大隻，比例仲啱啱好，由頭到腳襯到絕。

佢本身唔夠高，着呢款勁拖身裙款完全撐唔起，如果個拖尾位短番，會更啱佢比例。而個嘴唇顏色太深色，同個裙色唔啱，有啲怪相兼嚇人。

入膊款式第一眼望落去好修長，襯個黑色手袋，配搭好穩陣，如果加啲大耳環或手鈪，令造型更搶眼。

眼前一亮，着到好sharp，凸顯到佢花瓶身形，最鍾意佢冇亂加飾物，簡單配上一對小耳環，經已簡約高貴。

佢唔需要袒胸露臂都着出嗰份艷光，條裙雖然簡單，但佢好識配搭，大鑽石耳環、手鈪同戒指，全部都點到即止，艷壓全場。

圓領跌膊嘅剪裁，令佢身形好圓潤，又冇腰線，成個水桶咁；髮型長又摟休，好街坊、好求其，驚驚！

著名星級造型師郭慶彬（Ricky）曾出席米蘭與巴黎時裝周，以及在中國時尚節目《美麗俏佳人》擔任嘉賓主持，近年也被各大品牌邀請客串造型顧問，為VIP提供服飾資訊與配搭技巧。

Ricky曾為李冰冰、吳君如與張惠妹等擔任造型師，地位被肯定。