鄧麗欣未玩夠求婚SAY NO

拒做玉女 大膽革新

Stephy今年將回歸香港推出廣東碟，衝破走音陰霾，更一改形象玩大膽，決意做番自己！

近年主要喺內地發展，今年會放番多啲時間喺香港，距離兩年再出廣東碟，好多fans都叫我唱番廣東歌，呢個都係我心結，自己都好掛住唱廣東歌。雖然以前畀人話過走音，但都好耐嘅事，畀一個問題纏擾咁耐就唔好，人應該向前望嘛！只要有好作品大家就會記得，就有人識欣賞。

新碟收益行善

今次新碟唔係為賺錢，所有收益會用作慈善。好開心可以由自己控制，做自己想做嘅音樂。形象上會同以前好唔同，今次會玩得大膽啲，唔知大家點睇，我一向都唔認為自己係玉女，今次呢個先係真正嘅我。

曾被彈走音的Stephy，直言會再闖樂壇，製作更好作品。	Stephy與小方拍拖多年，笑言若結婚會效法伊健。	Stephy常與Kary合作，二人老友鬼鬼非常合拍。

「餅碎」圈中最老友

Stephy性格內向，笑言「餅碎」為圈中老友，因眾人性格不同先夾到，更會定期約食飯傾少女心事。

Stephy將一改形象，於新碟玩大膽。	Kary於紅館開騷，「餅碎」為圈中死黨，例必撐場。	Kary與余文樂感情穩定，難怪Stephy亦睇好二人！

圈中最Friend嘅應該都係Angela（區文詩）、Kary（吳雨霏）、Miki（楊愛瑾）佢哋幾個，坦白講我唔鍾意出街玩，唔係咁易有真心friend。我覺得友誼好講緣分，夾得來、互相關心嘅就係朋友。我哋多數約出嚟食飯，傾吓啲少女心事，有時幾個月先一次，視乎大家忙唔忙啦。同埋我哋有個group chat叫Girls talk，大家會share吓啲八卦嘢！

全女班玩裸曬

其實我哋四個啲性格好唔同，Kary同Angela會似少少，佢地外向啲、衝動派，我就內向啲同冷靜啲，但我覺得一凹一凸先做到friend。我哋約去旅行約咗幾年都去唔到，一係搞唔掂，一係就約約下冇咗下文。如果去旅行我想去遠啲，希臘都幾好，最好去啲冇乜中國人嘅地方，可以喺沙灘開放啲，如果冇狗仔隊跟住嘅話，裸曬都OKo架！不過我唔會攜眷出席囉，話明Girls talk，梗係全女班啦！

組織家庭 恨天倫樂

小時侯父母離異的Stephy，希望組織家庭，修補缺乏家庭溫暖的遺憾，雖認為小方是結婚對象，但笑言仍未玩夠，未想出嫁！

細細個爸媽已離婚，當時我認為自己唔會結婚，人大咗反而想建立家庭，修補以前嘅嘢。我同小方（方力申）感情都幾穩定，拍咗好多年，但我冇話過認定咗佢o架，呢個年代唔講認唔認定，隨緣啦。佢一定係合適嘅結婚對象，但如果佢依家求婚我一定唔肯，哈哈！我知佢唔會，大家雖然冇傾過，但有共識。而且自己都未準備心態結婚，仲想玩樂吓、自由吓，我都仲未有定落嚟嘅心。

學伊健搞秘婚

如果結婚我希望喺呢十年內，因為想盡快生小朋友！但都會繼續做嘢，我工作狂嚟o架，成功嘅媽咪應該可以湊仔湊得好，又兼顧到事業。不過我又真係冇諗過婚禮要點搞，唔想搞咁多嘢，平時工作已經要見好多人，唔想結婚都要做訪問，想Private啲，最好只係搵最親嘅屋企人同朋友搞個Party就可以。或者可以參考吓鄭伊健咁，瞞天過海結婚真係好犀利，我諗我都會秘密結婚之後先公布，不過要成功都幾難！

睇好Kary搶閘嫁人

如果我結婚都唔知係咪搵佢哋幾個做伴娘，睇吓邊個結婚先啦，可能佢哋結晒婚先到我結！我哋都估過邊個會搵唔到伴娘，哈哈，呢啲我估自己好喇。依家照咁睇可能Kary最先結婚都唔出奇！我講笑咋，我諗最快結婚應該係Angela啦，佢同男朋友咁穩定！

化妝：Boo

服裝：iiJin

場地：港威酒店