周秀娜改電話避Avis翻撻

性感女神周秀娜昨日展露四吋事業線和長腿，率領同門師妹師弟出席《九龍表行尖沙咀ISquare全新概念店開幕禮》。娜姐完成剪綵後，獲集團董事總經理黃錦成博士握手致謝，並向她表示希望日後的分店裝修像她一樣美觀、漂亮，娜姐聽後開心得笑逐顏開，事後她說：「我都要多謝佢，佢話舖頭裝修得愈來愈靚，因為個概念係年輕。咁我今日都打扮得好後生，青春嘛。我都好想裝修得愈來愈靚，過多幾年都要保持青春心態。」

學入廚傍身

娜姐早前被拍到與電影監製結伴到超市購物，問到二人發展如何，她說：「發展得幾好，佢係我同事嚟o架，次次同男同事出去唔知點解就會話佢哋，我好驚之後出去工作再冇同事陪我，可能要物色一個大隻女仔助手。其實我同佢同一個月生日，一班人整吓嘢食，佢有老婆o架。」她表示現在喜歡鑽研煮食，問到是否有新目標出現，她說：「因為過往拍拖知道回家會有人照顧，倚賴性好強。依家會學下入廚，要獨立。」

周秀娜獲表行集團董事總經理黃錦成讚漂亮，開心得笑逐顏開握手多謝。

（左起）黃雅芝、孫秉樞、方剛、周秀娜、區宇凡、黃錦成、黃家恆齊主持剪綵儀式。

懶理佢冇job

對於有指舊愛Avis與她分手後工作量大不如前，要到泰國拜佛求姻緣，她說：「我唔知，唔關事，我媽咪都有拜佛，信仰啫。（佢工作少咗？）問番佢。（冇聯絡？）冇嘞。（生日傳短訊畀你？）我改咗電話，因手機壞咗。（手機壞都唔使改號碼噃？）大家分開咗，盡量少啲講咁最好，講太多會傷害性多啲，分開咗各自生活最好。（佢情況點？）咁舊。我都唔知佢情況，（因佢致電箍煲而改號碼？）我冇收過，可能我已改咗，收唔到。（之前收過？）太耐唔記得嘞，依家只期待有一個新嘅人送一隻好啱我戴嘅手錶畀我。」

文：影視組