陳嘉桓衛志豪保愛苗唔夾口供
昨日《好報》踢爆20歲的陳嘉桓與37歲的有線主播衞志豪遠赴韓國拍攝節目而撻着，常以皇上自稱的「衞帝」衞志豪更做體貼男友幫女友搵工和搵樓。二人為保個多月的戀情，昨日各自出席活動時死口唔認，Rose拿母親做擋箭牌，「衞帝」解畫則明顯與Rose唔夾口供，擺明有嘢！
前「峯嫂」陳嘉桓（Rose）被《好報》踢爆與有線主播「衞帝」衞志豪4月底遠赴韓國拍攝節目時，因飾演前世戀人而戲假情真撻着，衞志豪更於facebook洩蜜，以「皇上」、「皇后」形容二人關係，而「衞帝」早已融入Rose家中，一周內陪Rose及Rose媽四圍去，又幫Rose搵新竇、搵筍job。
未有意搬屋
雖然二人戀情曝光，但Rose昨午現身品牌派對時，死撐二人只是朋友︰「我唔係同Michael（衞志豪）拍拖，係朋友，佢同我媽咪friend啲。總之依家未有男朋友。」對於與「衞帝」及母親三人行去睇樓，Rose強調當日只是陪母親去睇相︰「嗰日係等媽咪收工去睇相，個睇相係Michael介紹畀媽咪，所以一齊去。」她直言未有意搬屋︰「依家住得好舒服，嗰日我拎紅白藍膠袋只係拎舊衫去捐。」
直言不避忌
「衞帝」於有線活動中同樣死撐，提到當日為Rose搵新竇，「衞帝」卻表示是帶Rose出席聚會，而非女友口中的「睇相」！他續說︰「我哋係朋友，梗係唔係拍拖，我邊有咁嘅本事。我哋識咗好耐，同Rose嘅媽咪係同一個髮型師，而且Rose成日上有線節目。」
他指事後有跟Rose聯絡，直言不會避忌，會跟Rose和其母親再去食飯。對於生日時攬對方腰滿場飛一事，他未有否認與對方表現親暱︰「我8月先生日，嗰日係陸浩明生日。（Rose係你杯茶？）啱唔啱依家唔知，暫時冇諗。（係咪玩地下情？）呢個世界邊有地下情？同佢個節目收視好，當係宣傳。」
文︰專案組