蔣家旻上位 身價照舊
無綫女藝員蔣家旻（Angel）自拍攝處境劇《愛．回家》後形象入屋，早前被睇中拍攝百貨公司廣告，要在幾小時內不停跳躍表達青春的感覺，她笑言跳到腳抽筋，似有用不完的體力：「以前有學過跳舞，但已經好耐冇拉筋同做運動，之後對腳痠痛咗幾日呀！不過好開心係工作人員竟然讚我跳得高！」
Angel又要躺在波波池中被掟波波，更高呼過癮：「令我諗番起入行冇幾耐拍《勁歌金曲》宣傳片，又係有好多波波，感覺得意！」她直言珍惜每次工作機會，不會因人氣攀升而加價：「價錢合理就ok，有時講心唔講金，多啲曝光對自己都有幫助。」