傅嘉莉硬食卓羲檸檬急解畫
早前有報道指吳卓羲撻着模特兒傅嘉莉，女方出席活動時更暗示二人的拖友關係，惜慘遭男方派檸檬否認，昨晚她現身活動時就尷尬解畫，指自己辭不達意：「我哋係好朋友，大家感覺良好，佢係好多女仔鍾意嘅類型，（對方即刻劃清界線好小器？）大家都有共識，一向都係好朋友，可能我自己答得唔係咁好，（但之前傳佢追你？）佢對個個都好好，現階段大家都係好朋友，（地下情？）總之我哋係好好朋友，佢代表我同大家講番，（食檸檬？）冇，佢都係講事實啫，咁佢都真係筍盤，不過未必適合我！」她笑言報道令身邊人誤會，甚至連傅媽媽也以為女兒真的拍拖了。
而同場的岑麗香就透露與黃宗澤一同拍劇，問到二人可會假戲真做？她即說：「我哋只係啱啱識嘅普通同事，（佢對女仔好好？）好正常，（加分？）每個人見到都會加分！」她又謂不知道對方傳有新歡，因二人沒談私人事。
