楊采妮buy徐克 有話直說
楊采妮（Charlie）與徐克有着說不盡的緣分，最近她執導之新片就由徐克任監製，被Charlie視如父親的徐克，拍戲出名認真，不過，他擔心自己在拍戲過程中過於強勢令Charlie不舒服，故在她拍戲時「自動消失」，免加添其壓力！但Charlie卻對他的有話直說十分受落。
楊采妮與徐克在1994年因電影《梁祝》結緣，之後兩人保持友好關係，早前，Charlie執導電影《聖誕玫瑰》，一直都有為該片畀意見的徐克，經片商之邀，順理成章與另一知名電影人張之亮擔任了該片的監製，徐克直言今次當監製有一些擔心：「我好驚嚇親Charlie，因為我做嘢好坦白，唔會留餘地，我覺得拍戲，客氣係冇用嘅，拍到導演想要嘅嘢先係重點，有時自己太唔客氣，都會覺得好似衝動咗，但性格係咁冇辦法！」
冇去過探班
徐克還揚言Charlie拍戲期間，從冇到過片場探班，因不想阻礙她工作：「我做導演都唔想監製嚟片場，嚟玩冇問題，但如果係嚟睇我點拍，我會覺得好煩，所以，我冇去過拍攝現場，只在拍攝之前同之後畀意見。」
雖然徐克有所憂慮，但Charlie對他的有話直說，卻相當受落：「OK㗎！我知佢係對事，為你好先會講，我情願有事就講出嚟，好過之後先嚟話遺憾！」
讚「父」幽默
今次合作令兩人感情更進一步，大家更深入了解，Charlie笑言由初初合作《梁祝》開始，都已經對徐克有父親的感覺：「可能佢畀人覺得好嚴肅，但其實佢係一個好幽默嘅人，當年合作已經成日想同佢靠近一啲，佢好有爸爸嘅感覺，到依家都甩唔到。」
文：影視組