楊秀惠靠賢淑 洗底甩奸名

楊秀惠過往經常演奸角，難免被指指點點。最近她於《金枝慾孽貳》的角色大洗底，獲不少讚賞。楊秀惠飾處處包容丈夫、默默耕耘的賢妻，她說：「近期啲朋友、粉絲睇完劇，都話乜你老公關禮傑咁衰o架！睇見你就慘。好開心朋友讚我做戲進步咗，佢哋話估唔到我做內心戲做到嗰種痛嘅感覺，其實係劇本寫得好，喊都有唔同嘅層次，好開心演出得到認同，今次呢個賢妻角色真係令我成功洗底。」

當監製「冇到」

雖然楊秀惠角色討好，但《金枝貳》收視卻持續低迷。她說：「可能因為第一輯外間期望好高，團隊其實已經做好自己本分，有份參與已經覺得好榮幸。真係好鍾意監製戚其義、周旭明創造畀我嘅角色，同埋同佢哋第一次合作，阿戚每一場都會喺度睇住，初時都有啲緊張，要說服自己當佢冇到，唔好畀自己有心理壓力，今次同佢合作學到嗰種認真嘅態度。」

關禮傑好老公

飾演楊秀惠丈夫的關禮傑因懷疑妻子不忠，出手打老婆，但戲外關禮傑卻相反十分錫老婆。楊秀惠說：「佢現實中好錫老婆，成日掛老婆喺口邊。佢一開工埋位就畀到老公嘅感覺我，但一停機佢自自然然就停，怕老婆會呷醋。」

文：影視組

髮型：MAREK