亞視台慶logo 網友笑「死」

亞視前日在大埔總台舉行56周年台慶盛典，安排了一眾藝員舉起大型紙牌砌出56周年台慶logo，而logo昨日在互聯網上被網民瘋傳，不過一眾網民看到後都認為logo十足「死」字，有網民留言「係咪冇錢找數畀個設計師？」、「點解橫睇豎睇都似個『死』字」等。

亞視執行董事盛品儒昨日回應指logo由美術部門設計，但不會因此問責，他又死兜logo唔似「死」字：「logo推出之前係經管理層睇過，大家都唔覺似『死』字，反而覺得設計充滿現代感同美感。」盛品儒認為logo被廣傳表示大家仍是關心亞視，但亦會考慮應市民要求為logo作輕微修改。面對亞視台慶與「死」扯上關係，盛品儒乘機玩暗寸：「死都未必係亞視死，可能係其他人死呢！（邊個係其他人？）講笑啫！」

盛品儒	前日有份舉牌的鮑姐直言「聽到都心痛」。

顏子菲寄望明年

至於其他亞視藝員對「死」各有見解，顏子菲表示自己前日有份舉牌，但唔認為logo與「死」相似：「係56年啫，57年就唔會有啦，希望等到57啦，我都係靠呢份糧過活。」另外，鮑起靜前日有份為台慶活動擔任嘉賓，已完約的鮑姐現為香港電視開工，但她對30年賓主關係的亞視畀人「唱」感到傷心：「我聽到都心痛，電視工業要百花齊放先好，我唔希望畀人講中亞視『死』，我想佢進步。」有傳林韋辰及陳啟泰因早前接受訪問支持政府發牌而惹亞視不滿，故缺席台慶活動，林韋辰否認有其事：「我本來係當日司儀，但有工作在身先冇出席，我亦唔認為公司會因我講嘅嘢而有咁嘅做法。」盛品儒則回應亞視並無不滿，香港有言論自由，但對兩大亞視代表人物齊齊缺席台慶表示唔清楚，並指是由製作部安排演員出席。

亞視台慶logo	前日亞視全台職藝員齊齊砌起logo，怎料變網民笑話。	眾前亞姐前日性感撐台慶。

文：影視組