姜麗文姊妹奪愛捉姦在床
秦沛女兒姜麗文的鬼妹仔性格令其身邊不乏裙下之臣，歷任男友更是無分國界，雖然表面「戰績」彪炳，但實情愛情路上傷痕處處，當中hurt爆的是親手揭發台灣半圈中男友「偷食」，捉姦在床後更驚覺「小三」是自己的好朋友，簡直是一生中最痛。
秦沛乖女姜麗文（Lesley）剛推出新歌《Forever》，她坦言這是出道以來最真的一首歌：「歌詞寫晒我啲秘密出嚟，例如我係咩類型嘅女朋友、鍾意咩類型男仔，希望歌迷都feel到拍拖嘅感覺。」談到感情世界，原來她試勻「無國界菜式」，但始終最愛「本地菜」，她說：「同日本男仔puppy love，最後都唔work out，同過台灣、內地、香港男仔拍拖。（未試過老外？）我鍾意亞洲人多啲，特別鍾意香港男仔，因為好浪漫同埋好肉麻，好鍾意人哋叫我『老婆豬豬』。」
與林德信關係「開心」
早前自爆被內地當紅女星「撬牆腳」後，原來她不只經歷一段情傷，與大多舊愛分手時都不歡而散：「有啲係因為佢哋呃我，有啲係因為異地戀。」數到最坎坷的一段情，Lesley再爆料與台灣半圈中人拍拖時，竟被好朋友橫刀奪愛，問到是否捉姦在床？她點頭示意說：「當時真係成個人shock咗，感覺好怪，個腦完全接受唔到，最後我自己走咗去。」
經過這段情傷後，她坦言對於識女性朋友有陰影：「驚咗同女仔做朋友，因為撬牆腳嗰個真係best friend嚟，好hurt！」提到與林子祥囝囝林德信傳出緋聞，原來兩人因為「星爸」而結緣：「我爸爸同佢爸爸識咗好耐，不過我同Alex都係大個咗先熟。（有機會發展？）唔諗呢啲嘢住，依家關係好開心。」
採訪：音樂組
場地：紅磡都會海逸酒店