洪卓立嫌棄童顏誓變大隻
歌手洪卓立（Ken）出道多年，憑其童顏冧爆不少女粉絲，實在令人羨慕，然而，Ken卻大呻青靚白淨的背後卻為他帶來煩惱，所以Ken立下心腸，誓要操fit變大隻，成為雄赳赳的「男神」。
洪卓立（Ken）一直以青靚白淨的形象示人，其童顏更成為「冧女」絕殺，「贏在起跑線」上的外表理應是人人夢寐以求的，但偏偏卻為Ken帶來不少煩惱，他無奈地說：「以上一隻碟為例，身邊嘅朋友聽完都讚好，但一見到我喺封套個樣就出事喇，話我成個細路咁，對我嚟講，我覺得咁樣會令到隻碟扣分。」至於緋聞女友湯怡可有「嫌細」？Ken就笑言：「哈！佢個樣仲細過我啦，呢方面佢對我冇乜意見嘅，不過我自己希望練大隻啲，睇落去會大個啲。」
被讚可塑性高
為進行「變大工程」，Ken在新碟中邀請到形象總監Alvin GOH設計唱片封套，Alvin就大讚Ken有可塑性，他說：「我覺得Ken嘅曳曳feel係幾吸引。」在旁的Ken即說：「係呀！難得今次終於有朋友大讚我嘅造型！」
未諗成家立室
談到新碟內容，Ken指出：「曾經喺人哋婚宴上獻唱歌祝福新人，發現原來自己幾喜歡唱人哋嘅故事，所以今次唔再只係講自己，會講人哋。」至於幾時到自己成家立室？事業為重的Ken就直言：「一切以事業行先，未諗咁多！」
文：音樂組