蔡少芬怨劇透多餘：仲使乜去睇？
蔡少芬主演的劇集《金枝慾孽貳》被觀眾投訴劇情難明，無綫急拍「劇透」（劇情透露）解謎，但她卻不認同，認為收視低迷是受謠言所累，觀眾人云亦云缺乏耐性煲劇。她覺得《金枝貳》如老火湯，嗒真才有味道，好戲在後頭。
是非指數遠高於收視的《金枝貳》出街後，不少觀眾高呼劇情高深難明令收視插水，亂陣腳的無綫急搵演員拍「劇透」補鑊，務求要阿婆都睇得明。可惜劇透出街後收視也未見起色，蔡少芬直言此舉多餘。她說：「講真我唔鍾意咁樣劇透，都講晒劇情出嚟，咁睇嚟做咩呢？多餘！開頭劇情封鎖唔畀講，就係想觀眾估唔到。但係第一個禮拜之後就拍咗劇透，你話唔明咪講到明晒囉！其實想睇嘅觀眾自然會睇，唔睇嘅觀眾亦唔會因為劇透去睇，都知道晒劇情仲使乜去睇呢？」
以湯喻劇 嗒真有味
劇集內容講述宮中風雨由謠言而起，蔡少芬認為收視低迷亦同樣受謠言所累。她說：「我覺得係觀眾先入為主，第一集已經話唔明，應該畀多啲耐性去睇，有啲師奶聽到難明就唔會去睇，令到件事誇大咗。好似套劇所講嘅謠言一樣，謠言可以整死一套劇。希望做多啲宣傳，等大家睇法變番正面。」
蔡少芬認為好戲在後頭，收視有力回升，劇情其實是師奶至愛。她自信地稱：「其實後尾劇情係講鄰里、家庭，係師奶睇得明同鍾意睇嘅劇情。電視劇係要煲，唔好似即食麵啦！老火湯要煲，嗒真先有味。」
愛飛紙仔 更大挑戰
提到鄧萃雯轟《金枝貳》「飛紙仔」零劇本，引起編審周旭明反寸雯女如老鼠急跳沉船。蔡少芬對「飛紙仔」則另有睇法：「我就唔知其他人，我就冇問題，『飛紙仔』唔使做功課，收到劇本就用第一身去演繹，咁演會更新鮮，角色出嚟更立體。我反而鍾意咁喎！好似依家拍大陸劇，雖然有晒劇本，但係我都只係會略略去睇下故事大綱，到拍之前先去背熟嗰日嘅劇本，出嚟效果會更加估唔到，咁樣有挑戰啲，效果唔會同以前演過嘅一式一樣。」雖然《金枝貳》收視麻麻，但她亦覺得係代表作：「每部戲都係我嘅代表作，唔係要攞獎、收視好先有價值，只係講起部劇嘅人唔覺得我做得差，已經係我代表作。」
文：影視組
攝：司徒國榮
服裝：Jessica
髮型：Barry Tran（Hair Corner）
場地：The Box（ifc）