琦琦舞動天橋 驚完嗌過癮
久未行天橋的名模琦琦為設計師Stella McCartney再度登場，但卻因為今次行騷要跳舞而隨即被考起，並為接受這項挑戰而膽戰心驚，幸好最後順利完成，在天橋上翩翩起舞，又被男舞蹈員抱起轉三個圈，令她大呼過癮！
琦琦昨日在微博上載了她行騷的照片，與眾分享這難忘的經驗，記者致電琦琦，她透露現身在上海，前晚為Stella McCartney行騷，同場還有不少進身國際的中國名模如杜鵑、裴蓓和陳碧舸，以及芭蕾舞蹈家譚圓圓等合力演繹品牌最新的時裝。除了行騷外，還以舞蹈帶出「夜上海」那紫醉金迷的感覺，整場騷令人嘆為觀止，獲台下不少掌聲，琦琦大讚是一個難忘的晚上，她說：「今次是近幾年來最好玩嘅一個騷，初時大會要求我在台上跳一點舞，令我與經理人都有所猶豫，有啲擔心，因我從未試過喺天橋上跳舞，所以都考慮咗幾日，後來覺得應該乜都試吓，所以最後都答應咗。」
練兩小時即上台
琦琦表示今次練舞只是練了兩個小時，舞伴跳得很好，帶動了她。被問到在天橋上跳舞是否感到吃力？她笑言：「當模特兒要跳住舞行騷實係唔容易，之前一直好擔心條裙太長跳起舞會好難，雖然都容易，但對我來說也是個大挑戰，而且我還被男舞蹈員抱起轉三個圈，感覺好驚，但事後他竟然話我輕，仲讚我跳得很好！」
設計師不停稱讚
琦琦開心表示整場騷出來效果很好，連Stella在台上睇騷時，對每個環節都不停鼓掌，她說：「我第一次同Stella合作，佢好nice，係好有魅力嘅人，而且好正面，不停讚人，完騷後佢不停讚我哋嘅表現，又讚我哋靚，讚到我都唔好意思。」Stella今次選擇在上海舉行大型時裝騷，隨即來香港，昨晚在港舉行私人晚宴。
文：名人組