陳鍵鋒心急搵女友黐身免問

藝人陳鍵鋒自年前離開無綫後，轉戰內地拍劇發展，近日他忙於與張馨予在橫店拍攝內地古裝劇《封神英雄榜》，適逢他本月初踏入35歲生日，大批粉絲帶上多個蛋糕和禮物前來探班，當中鍵鋒收到一個海洋蛋糕，令他十分驚喜，他說：「我好鍾意潛水，覺得海底世界好靚，估唔到Fans咁有心送個海洋蛋糕畀我，靚到唔捨得食。（正日生日點慶祝？）都係同朋友食飯，因為套劇都好趕，但劇組已經好好，放我一日假。」

談到生日願望，鍵鋒直言想搵女友，盡快成家立室，他說：「年紀都唔細喇，想搵番個女朋友拍幾年拖，之後結婚生仔。（父母有冇催？）佢哋好開通，都知我專注事業冇時間拍拖，不過我自己都想。（想搵咩類型女仔？）想大家有共同理念同睇法，亦都要畀對方空間，唔好太黐身。（外形呢？）最好係高高瘦瘦。（搵內地女友？）應該唔會，始終喺內地發展耐咗，就發覺好多文化差異，總之一切隨緣啦！」

陳鍵鋒於劇中需要扮老，化妝要費一番工夫。

大批粉絲到橫店賀壽星仔，令陳鍵鋒喜出望外。

滿意酬勞

至於近年不少港星北上搵人仔，有傳鍵鋒每集酬勞達六位數，他只承認內地劇酬勞較高，亦感滿意，他說：「我從來唔想將片酬造新聞，總之不過不失啦，付出同收入成正比。」他透露在《封》劇與內地女星姜鴻扮演夫妻，有一些搞笑為主的親熱戲。

文：專案組