寸嘴Barbie靠意志逃出鬼門關
擁有35C「胸」湧上圍的「寸嘴Barbie」夏尉喻（前名廖祉甯），口才與其身材一樣出眾，但原來其意志力亦一樣令人刮目相看，出身自單親家庭的Barbie曾兩度患上急性心肌炎，逃出鬼門關的她更娓娓道來其坎坷的經歷！
樣靚身材正的夏尉喻（Barbie）雖然外表嬌柔，但原來內心卻堅強無比，出身自單親家庭的Barbie自9歲起便肩負起照顧弟妹的重任：「我9歲時父母就已經離婚，之後佢哋就各自嫁娶擁有自己嘅家庭，我同細佬妹都係祖父母湊大，同父母一年都只見一次面，有時我仲要幫手照顧細佬妹，好記得3年前我妹妹奉子成婚，我仲要向祖父母瞞住妹妹懷孕嘅消息嚟幫手搞婚禮！」
與未婚夫各走各路
沒有父母在身邊，4年前Barbie患上急性心肌炎重病，更要自理「身後事」：「當年我喺公司暈低不省人事，被上司call白車送入醫院，之後仲入埋深切治療部，醫生話呢個病嘅死亡率好高，要我寫定遺囑向細佬妹交代身後事，當時仲要刻意瞞住祖父母，好彩手術後我都大步檻過！之後仲因為呢個經歷同送我入院嘅上司墮入愛河，佢仲成為我嘅未婚夫！」Barbie早前不幸心肌炎復發，可惜未婚夫早已離她而去：「兩年前我同未婚夫曾經入紙申請結婚，可惜最後都因為性格不合分手，之前我心肌炎復發仲要自己一個人call白車！」豁達的Barbie笑言渴望能尋得「真命天子」：「兩次都死唔去，我相信未來會更好，希望將來有個更適合我嘅人照顧我！」
採訪：李佩珊
攝影：吳文聰
場地：阿穌水療