張繼聰撇甩老婆圓鐵騎夢
張繼聰跳入公仔箱後人氣急升，並已落實接拍《老表，你好嘢！》續集，一劇接一劇的阿聰仍不忘完成「鐵騎夢」，通宵趕戲後堅持繼續練電單車，雖然捱夜攰爆練車，希望學有所成後撇甩老婆謝安琪，自駕享受一個人的浪漫。
憑一劇《老表，你好嘢！》而人氣急升的張繼聰在無綫愈撈愈掂，除了正在拍攝清裝劇《食為奴》外，更已落實接拍《老表》續集，與王祖藍繼續發放笑彈。據知，阿聰手上的工作檔期已排至明年初，除了將為卡通片電影主角配音外，更獲高層梁家樹賞識，邀請拍攝重頭劇《醋娘子》（暫名），認真巴閉！
大清早現身
正在拍攝《食》的阿聰日前即使通宵趕戲，仍然一大清早死撐學電單車，希望一圓「鐵騎夢」。約早上９時，戴上冷帽及螢光粉紅耳環的阿聰現身香港駕駛學院，其後換上頭盔及「龜背」等「學神」裝束，再騎電單車兜路練習，為即將的路試作好準備。由於捱了一晚夜，阿聰不時露出疲態。
阿聰表示一直有興趣學電單車，提到他似精神不足？他說：「唔瞓都要練習，我已叉定電，自己都會小心。」問到得到老婆謝安琪（Kay）支持？他稱：「佢有支持，但叫我學完唔好揸。」但阿聰稱即使他日成功Pass亦不會以電單車代步，向老婆大派定心丸：「唔會主力揸電單車，考到牌我會自己揸唔載人，一個人嘅浪漫。」
成日唔夠瞓
阿聰亦承認接拍《老表》續集，並指將會是全新故事，但稱未知自己角色：「大佬人物王祖藍呢排我見佢一係講對白，一係就瞓到不省人事，我唔敢問佢咁多。」問到酬勞有增加？他笑言：「酬勞固之然緊張，但係我寧願加我睡眠時間，我成日唔夠瞓。」
文：音樂組