Ana R.一年後生B 誓做嚴母
混血名模Ana R.昨日出席活動時透露有意一年後生BB，又大讚男友Brad將來會是一個完美父親，是可以跟她共度餘生的人。Ana表示兩人同樣喜愛小朋友，而將來在孩子面前應由她來當「衰人」，為了孩子着想，自己會是一個嚴母。
Ana R.昨日與師妹陳瑞瑩（Helena）一起出席慈善午餐會並擔任模特兒示範珠寶，提到有關善款用來幫助女性，Ana表示這跟她心中理念很接近：「我成日幫助細佬嘅前妻，而媽咪以前為咗養大我同細佬，佢要辛苦打三份工，所以深切體會有很多女性需要幫助。」問到她人生中可曾試過感到無助？她說：「每個人都會經歷，我覺得最無助嘅時候係當我八歲時，我爹哋走咗冇再返過嚟，嗰時係我過得最艱難嘅時期。」
Brad可共度餘生
和男友Brad拍拖甜蜜蜜的她透露打算一年後生BB，問到她男友可會是個完美爹哋？她即大讚男友說：「佢係o架，he's wonderful！佢好鍾意小朋友，同埋佢本身都好似個小朋友咁，成日令我笑，佢係可以同我共度餘生嘅人。（想生幾多個？）以前希望生五個，依家應該只係會生一個。（你哋邊個會做好人，邊個做衰人？）我諗我會做衰人，喺一個家庭入面一定要有一個做衰人，我媽咪都係好tough，對我哋比較嚴，咁都係因為佢愛我哋，我都會係一個比較嚴厲嘅媽咪。」
Helena寸師姐JC
而問到擁有34D上圍的Helena可會怕被拿來跟另一師姐、擁有「警鐘胸」的Jessica C.比較？她強調自己的驕人身材是得到媽媽遺傳，是很天然的，有暗寸師姐JC之嫌。她說：「我好鍾意自己嘅身材，覺得好有曲線，我都會行泳衣同內衣騷，希望多啲呢類工作。」問到可有被指樣子似碧咸嫂Victoria？她謂之前參加Asia's next top model時蓄短髮，就經常被指似碧咸嫂，也有人指她似美國模特兒Tyra Banks，她又透露男友是三項鐵人賽奧運選手。
文：名人組