無綫劇《金枝慾孽貳》下周五（31日）播映一連兩集大結局，據知無綫當晚暫定不會搞活動造勢。早前頻與同劇藝員搞「派對」谷戲的「如妃」妹妹伍詠薇，昨接受電話訪問時談到公司暫不搞結局派對，她笑說：「冇眼睇呀！哈哈！（咁你搞唔搞？）次次都我搞，今次叫主子（監製戚其義）搞啦！一齊睇都開心嘅，睇吓到時我哋班女仔點先啦！（係咪又怕畀人話唔叫雯女？）我驚乜嘢！我行得正、企得正！」
而同劇的蔡少芬（Ada）仍與老公張晉在馬爾代夫歎世界，更上載三點式水着照上微博，好友伍詠薇留言要求Ada騷出正面照，Ada則「出口術」謂若《金枝貳》收視能反彈，自己才會「翻身」，十分硬銷。