陳豪要浪漫 歐洲娶茵媺
曾是城中筍盤的陳豪近兩年與女神陳茵媺（Aimee）煙韌蜜運，最近有指兩人造人成功，但Aimee是否「有餡」仍各有各說法，不過陳豪昨日沒有作出否認，並直認正準備婚事，據知二人將會在歐洲舉行浪漫婚禮！
無綫42歲小生陳豪及32歲花旦陳茵媺（Aimee）拍拖約兩年，屢傳婚訊，有消息指陳豪斥資3,300萬元購入比華利山4,000呎別墅築愛巢，他亦開始北上拍劇賺人仔，至於Aimee早前從馬來西亞拍罷劇集《單戀雙城》後便開始推Job，並飛往加拿大休息，昨日更有指兩人已造人成功。據知，Aimee推掉的《寒山潛龍》角色，將由林夏薇頂替。昨日陳豪受訪時笑言多謝大家祝福，對於有餡傳聞？他說：「結咗婚先講，有好消息向大家公布！」據知，陳豪已揀定在歐洲娶Aimee，覺得比較豪華、浪漫及人煙較少，並只跟親人與密友分享。
黃德斌一早估到
至於Aimee是否有喜仍存疑，有《單》劇工作人員透露，Aimee平日甚愛飲咖啡，一日要飲幾杯，但當時她竟停飲咖啡，行為反常；亦有工作人員指Aimee日日狂食冇戒口，照飲涼茶及着高踭鞋，增磅全因為食所致，拍攝途中更遇上女士「唔方便的日子」。
昨日陳豪接受電台節目訪問時，問到是否將結婚？他說：「細個以為30歲會結婚生仔，我始終會（結婚），否則唔完整。（準備緊？）真係準備緊，但成事先講，唔係唔想畀人知，但唔想太高調。」此外，無綫製作資源部總監樂易玲不相信Aimee有喜，但會向陳豪了解：「其實Aimee都係上星期請假，佢係屋企有事。（結婚？）陳豪到咗適婚年齡，都應該有佢自己計劃，如果Aimee真係有咗，陳豪咁錫佢都陪埋佢飛啦！但個男嘅仲喺香港喎！所以我覺得依家未係囉！」而黃德斌笑言自己估到劇情：「依家話佢哋結婚，之後咪話佢哋生仔囉！如果係真嘅，會恭喜佢。」
文：影視組