李詩韻筍盤唔憂冇人要
李詩韻於新劇中飾演為目標而甘願犧牲色相的人，不過現實生活中，她坦言自己很簡單，又自爆之前曾秘密拍拖一年，但因性格不合而分手，她又指自己是好女仔，想做「女筍盤」，不想在感情上再受傷害。
李詩韻於新劇《情越海岸線》中的角色被塑造成「女神」，純情得來甚有野心，更多次利用初戀情人陳展鵬。為了演活「女神」角色，她坦言壓力甚大，要說服自己之餘，又不可太誇張，她說：「劇中我為事業向上爬而犧牲自己，認識富二代，反映咗社會真實一面，尤其商界中都有人以此為目標，埋沒良心去做事。（娛樂圈都有好多！）我比較簡單，生活冇咁複雜，身邊朋友都係外國返嚟，入行十年多，有段時間我都好唔開心，睇得啲嘢太重，不論獎項、感情、事業都係，不過依家我睇化晒，以前我好慳，唔捨得買嘢，講真，早兩年我先買我第一個名牌手袋，依家會使錢喺自己身上，去旅行、按摩享受，要令自己開心啲。」
不是豪放女
詩韻坦言之前曾被負面新聞影響，想過離開香港，她謂：「我覺得好唔公平，我係保守之人，根本唔係豪放，點解呢行啲女仔係單身就會被指淫娃，男仔好似馬國明、陳展鵬咁就叫筍盤，女仔都可以係筍盤，我都好多人想要。」
傷過多次心
問她現時是否都有很多人追求？她坦言每個男仔初相識時都好好，不過之後就現形，個個都是這樣，依家會認識對方耐一點先。」她又自爆其實之前秘密拍了一年拖，但最終因性格不合分手，故現時會看清楚、穩定些才再拍拖，她說：「我真係唔想再分手嘞！每一次分手都會傷心，傷過好多次，夠嘞！」
文：影視組