Yanny 洪卓立浪漫談情 攪濕長裙

跳唱女子組合Super Girls成員Yanny有幸與偶像洪卓立演情侶,開心到震的她大讚對方友善。雖然二人於心形石灘拍攝,感覺浪漫,但卻因潮漲搞到長裙盡濕,非常狼狽。

Yanny早前撇低Super Girls成員,與歌手洪卓立(Ken)拍攝電台劇,於劇中演聾啞少女的她與Ken有連場對手戲。Yanny自爆全家都是Ken的粉絲,故得知能與對方合作時非常興奮,更返家跟屋企人晒命。

讚偶像友善

Yanny笑說︰「我同媽咪都鍾意聽佢啲歌,佢哋知我同佢合作,成日問我感覺點樣。」她坦言與Ken拍攝時要不斷抑壓自己的興奮情緒。問合作時有否過電?她雖然否認,但卻大讚男方nice到爆。她說︰「佢好有禮貌,對每個人都好nice,令我更加欣賞佢,可能第時真係會愛上佢!」

兩人於烏溪沙沙灘拍攝,因現場有一個心形石灘,令身處當中的Yanny倍感浪漫。她說︰「嗰度真係好浪漫,而且可以同偶像一齊喺嗰度拍,確實幾冧,嚟呢個地方談情真係唔錯。」

狼狽嘆可惜

但Yanny直言當時適逢潮漲,由於來得太突然,整條長裙盡濕,由浪漫變為狼狽,大嘆可惜︰「我拍拍吓時先發現條裙濕晒,搞到非常狼狽,惟有下次再嚟呢個地方繼續浪漫啦!」

文︰專案組