家燕姐蜜運 囡囡催婚
薛家燕與大女石祐珊一向母女情深，每年母親節均有難忘經歷，家燕姐稱今年別具意義，等了十多年，終於可以一嘗與珊珊母女檔上陣為廣告代言，珊珊揚言想蜜運中的媽咪拉埋天窗。
家燕姐出名是大忙人，大女祐珊、次子耀庭、細女耀珠年幼時曾藉詞「見家長」，令家燕姐要百忙中抽空返家，原來三姊弟為送驚喜而「出茅招」，炮製充滿舞台效果及足夠食一個月的燕窩紫米露贈予母親。
家燕姐亦經常將三姊弟的窩心事掛在口邊，她說：「咁大缽燕窩成萬銀o架，不過佢哋真係好有心思，有年母親節我有五個活動，佢哋預早一個禮拜，叫酒樓提早整母親節餐畀我食。今年母親節我哋為Asana廣告做代言人，可以喺工作中度過，特別有意義。其實十幾年前已經有人搵我母女檔上陣，今年終於成事！（催珊珊結婚？）我明白未遇到心愛對象係急唔嚟，佢工作又忙，瞓覺都冇時間，當然遇到啱嘅話，就覺都唔瞓！」
與時並進破隔膜
珊珊被問結婚請飲一事，她笑言要禮讓母親：「媽咪先啦，佢蜜運中，早幾年我仲幫佢物色，依家見佢放工，有人同佢傾吓偈，都係好事。」事事皆以母親為先的珊珊續說：「其實起初我冇諗住接呢個廣告，因為覺得自己係幕後人（經理人），係媽咪鼓勵我至改變初衷。」
家燕姐則說：「好多媽媽以為仔女大咗，就唔需要注重儀容、唔使學新嘢，你睇我扮到咁靚，仔女都引以為榮，我仲同仔女WhatsApp，只要有心學，就算我呢種年紀都唔難。」
文、攝：影視組
化妝：Nicole Mak@Nicole makeup ＆ styling
髮型：Rick Tang@Aveda
場地：My Garden