陳嘉桓暗寸千語浮誇老積

陳嘉桓（Rose）昨日以奧比斯「愛眼行動之星」身份出席活動，期間戴上眼罩與在場小學生吃午飯，體驗失明人士的不便，自言零近視的Rose，被問到是否精於睇人，Rose自言此乃人生經驗，由於年紀尚小，故要慢慢累積經驗。

認見面少交談

對於早前於公開場合表示不認識「情敵」吳千語，但千語卻反指認識她，Rose指二人曾於公開場合見過面，但未有深入傾談，談到只有19歲的千語自拍拖以後，名牌手袋如時裝騷，對此Rose謂：「我覺得要平實啲，要睇自己年紀需唔需要牌子嘢，其實唔着牌子都可以襯得好靚，我今日都唔係牌子嘢啦！（覺唔覺得佢好虛榮？）每個人價值觀唔同，我自己生活夠就ok，食得飽，穿得暖嘛！（近日傳佢同林峯情海翻波？）其他嘢就唔知嘞！」

雖然不理別人感情事，但Rose就透露已單身好一陣子，亦沒有追求者出現，更謂：「我20歲啫！冇遇到就冇o架啦！（你想搵到個男仔同你講8次愛你？）呢20年嚟已經好多人講過愛我（男朋友呢？）唔記得啦！」

母親節各自過

另一方面，林峯女友吳千語昨日以黃色裙出席母親節活動，即場示範佈置蛋糕，她自言對食也有研究：「由法國菜到雞煲都鍾意食，但自己唔識煮，（為林峯學？）特別節日先。」問到可會與林峯母親慶祝？她說：「各自同屋企人食，（送禮畀男友媽媽？）互相為大家揀。」

記者提到林峯冇表示，吳媽可會生氣？千語BB即護男友：「唔會，佢拍緊劇唔喺香港，我哋連見面時間都冇，媽咪明白嘅。（見過男友家長未？）喺公開場合見過，大時大節都會講吓電話，（有冇叫你上男家食飯？）唔喺香港，就算返嚟都要拍嘢，冇時間。」

文：影視組