陳靜Stay Hungry 5年爭影后

慶幸冇畀人噓

DaDa憑第三部主演電影《低俗喜劇》中的爆炸糖一角，分別提名台灣金馬獎及香港電影金像獎最佳女配角，早前更在金像獎揚威擸獎，得獎當日她泣不成聲，遺漏了不少要多謝的人，仍屬新人的她自認爆冷，演技仍需加強。

「嗰日我好緊張，搏命忍住眼淚，因為我一喊就講唔到嘢，今次得獎係天時地利人和，要歸功畀導演、劇本同其他演員。我冇諗過聽到自己個名，冇預備講咩，漏咗多謝好多人，首先一定要多謝我公公婆婆，佢哋一直想我有一番事業，好支持我！仲要多謝幫過我嘅傳媒朋友，另外就係一班評審，我好好彩，適逢最近香港本土電影慢慢起番，大會又想幫新人，個獎係全team人功勞，係個角色幫我得獎。」

陳靜一擊即中贏得女配角獎，為了企穩陣腳，覺得仍需努力。

DaDa攞獎當日變喊包，在台上、台下都起勢咁喊！

「好多人話我係爆冷，我認o架！我一直覺得會係音音姐（邵音音）第三次得獎，其實每個提名人資歷都深過我，演技已經被認同，我仲有大把嘢要學習同加強，不過我又冇聽到有人鬧我噓我，都幾好彩！我會聽導演彭浩翔同前輩杜汶澤話，睇多啲書同電影，因為我只係咁啱呢次做到個角色，下次又未必演得好，對自己嘅演技其實未有好大信心。」

DaDa笑言與金像女神處於熱戀期，每日均要攬攬錫錫方能安枕。

DaDa得獎後揚言會不醉無歸，間中與好友把酒談心，無傷大雅。

努力說服觀眾

DaDa在芸芸o靚模當中「遲來先上岸」，比起「o靚模始祖」Angelababy（楊穎）及周秀娜還要早在影壇贏得肯定，可謂正式「脫模」升呢，得獎後她猶如上了膛的槍準備全力進攻，更雄心壯志立下宏願「食住上」，五年內升呢爭影后！

「由細到大都有睇金像獎，估唔到自己可以企上呢個台，得獎真係一個好大嘅鼓勵，亦令我認清目標，好開心搵到自己喜愛嘅工作，我希望愈來愈進步，五年內挑戰影后提名，有提名已經好夠！不過我知拍戲唔係為得獎，係要感動觀眾，我好認同影帝梁家輝得獎之後話，拍港產片唔加價，我都係，好希望香港電影繁榮番，多啲電影人投資，個行業好對我都好！得獎之後，多咗好多唔同地方嘅傳媒搵我工作同訪問，呢個獎係令我有壓力，令我唔可以怠慢，唔止演技方面，仲有態度，要努力說服觀眾，我咁大個女都未試過咁大決心，做好一件事！」

天天熱戀獎座

大多少女總是「戀愛大過天」，DaDa現在則是「有獎大過天」，與金像女神仍處於「蜜月期」，每日都要攬實同眠，並笑言暫時要獎唔要男友！未知是否受前輩杜汶澤影響，DaDa揚言不會揮霍慶祝，仍樂於做隻勤勞小蜜蜂。

「得獎後嗰幾日都要攬住個獎瞓，唔捨得放手，感覺仲sweet過熱戀期，個獎好似我另一半咁，我未試過咁滿足，好實在，亦令我想拍拖嘅感覺更加少，我唔係話一定唔拍拖，但感情隨緣啦！嚟緊我會帶個獎返上海，因為應承咗婆婆，畀個獎佢睇下，等佢知我呢幾年努力嘅成果，之後就好好存放喺屋企，放喺個當眼地方，每日自我激勵要做得更好！」

「我冇諗過買啲咩獎勵自己喎！哈哈！我唔會咁快畀飽飯自己食，到有一日覺得自己真係得先，一來要keep fit，而且要更加努力鞭策，再勤力十倍，繼續接多啲戲。我以前內疚冇咩時間畀家人，但媽咪同我講呢幾年唔需要畀太多時間畀佢，叫我畀心機學嘢同做好角色，令我更無後顧之憂！」

後記

DaDa踏足影壇日子尚短已「戲」勢如虹，但她沒有一朝得志而變得驕傲，短短的訪問中，她起碼說了三十次多謝，來自單親家庭的她更將母親及外公、外婆掛在口邊，非常孝順！獲得母親全力支持，現時的DaDa充滿正能量。