黃秋生與契女梁洛施、張敬軒與密友關智斌及詹瑞文前妻甄詠蓓，據知前晚到軒仔家中聚會，秋生昨日凌晨在微博貼出合照，他在電話中說：「本來約咗軒仔同甄詠蓓傾舞台劇，後來要煮嘢食，工序超多，傾唔到啦，我煮咗焗麵包、番茄湯同蜆肉意粉。（契女梁洛施有冇帶埋啲仔嚟見你？）咁細個又要返學，帶住周圍走咩！（想斟契女合作舞台劇？）冇呀，湊仔咪仲好！（佢幾時離港？）冇問，佢幾時走對我嚟講，都係得尋晚一晚，又唔會日日約出嚟嘅！（佢有冇分享吓戀情近況？）冇，成班人傾偈，佢就好靜咁坐喺旁邊笑囉！」
軒仔昨晚電話回應說：「我出年同秋生哥舞台上有合作，一直想拜師跟佢學戲，傾落幾投緣，就約食飯，我仲同秋生哥約埋去超市買餸。初頭佢話帶多個朋友嚟，就係梁洛施，原來佢哋約咗同一日。（關智斌又在場？唔驚又傳你哋斷背？）唔驚，我哋就嚟都係同事，佢嚟學做戲同煮嘢食。」