鄧麗欣先有B後結婚

藝人鄧麗欣（Stephy）、徐子珊、黎耀祥、沈震軒、丘凱敏、洪卓立昨日出席公開活動，又再消瘦一圈的Stephy指因早前在橫店拍劇時十分辛苦：「同埋食唔慣上面啲嘢，不過我休息咗成個月，之前去咗旅行已經肥番啲。（同男友方力申去？）唔係，同朋友去，佢要搵錢呀嘛。」對於屢傳婚訊，Stephy再次否認：「未結呀，點解你哋唔信，我今日着鬆身衫，不如話我有咗啦。（有結婚計劃？）我冇，佢都未求婚。（咁衰？）咁呢個我要幫佢，唔求唔代表衰。（有咗先結婚？）都唔介意，因為結婚都係為咗生B，不過就唔希望程序調亂啦。（安全性行為？）我本身好安全。」

而以連身裙上陣的丘凱敏肚凸凸，上落樓梯亦要工作人員小心扶實，疑似大肚，不過她笑笑口否認：「唔係，可能減少咗工作，肥咗啲，而且頭先冇挺胸收腹啫。（怕小器唔講得？）唔係。（有生B計劃？）唔抗拒，順其自然啦。（不設防？）好尷尬，我隨時都可以迎接BB，不過今年蛇年唔係太好，下年啦。」

方力申	徐子珊為新劇減肥襯番拍檔黃子華。	黎耀祥牛一獲老婆獻吻，甜晒！

徐子珊減肥唔怕暈

而下星期將和黃子華為新劇開工的子珊表示前晚子華請劇組食飯：「子華真係好瘦，面又瘦，所以我呢排都要努力減吓，依家一日淨係食一餐，其他時間就自己整蔬果汁飲。（會暈低？）我諗唔會掛。（叫子華增肥易啲？）好難，佢尋（前）日都冇乜點食嘢。」而同是今日生日的黎耀祥和沈震軒都異口同聲表示生日要在工作度過，沈震軒表示昨日第一日為葉念琛的電影開工，談到此片原本有已故歌手陳僖儀（Sita）份，問誰代替Sita的角色時，他說：「唔知，電影公司會有記招公布。」而49歲生日的黎耀祥被問到有沒有中年危機時，他笑說：「冇喎，反而3字踏入4字嗰陣就有，因為怕冇成就，又轉唔倒行。」

文：影視組