林建名認嬲趙碩之

大名娛樂老闆林建名昨日出席仁濟醫院林百欣中學「共建三十．同創世紀」齊破健力士世界紀錄活動，提到旗下藝人趙碩之日前向本報哭訴「被續約」五年，又指如解約要賠40多萬，問林生知否Wylie不開心？他即勞氣說：「冇辦法，佢梗唔開心啦。（了解佢情況？）一路了解，開咗三次會，但佢一直冇答覆。」

「開會用兩個鐘」

談及Wylie自言當林建名是爸爸，林不屑說：「希望係啦！」問是否很嬲Wylie？他終按捺不住怒火謂：「當然嬲啦！每次開會都用兩個鐘！（若然解約要佢賠40萬？）係！因為呢個係投資喺佢身上嘅成本，冇賺佢，都冇計佢職員費用。」再問會否對Wylie感失望？他嬲爆拋下一句「直情係！」之後便被工作人員拉走。

本報記者致電Wylie，她接電話時聲音沙啞，似曾哭過，她坦言有看網上即時新聞，知道老闆林生很嬲，並無奈說：「我都唔知講乜，我以前以為大名娛樂係個家庭，我喺嗰度成長，就算十年都冇所謂，但中間發生嘅嘢唔係我要，大家冇共識。我仲發覺係講金唔講心，本身自己好想講情義，發覺係唔可以。」

碩之反擊開會急

記者指林生說曾與Wylie開會三次，每次開會都費時兩小時兼一直沒答覆，Wylie聽罷便激動爆喊說：「係有同林生開過幾次會，但每次都開得好急，其實唔夠一個鐘。我唔係冇回覆，只係唔知回覆乜，自己已表明想走，但佢哋竟然要我賠錢，其實我唔知覆佢係續約定賠錢方面。」Wylie續說：「冇理由投資失利要藝人賠錢，我從來冇見過同聽過自己同外面啲合約係咁，總之感到好難過同失望，失望係覺得呢個時候完全搵唔到幫助。」

文：名人組