嘉玲爆偉仔浪漫悶蛋
梁朝偉完成電影《一代宗師》後一直處休，昨晚太太劉嘉玲出席活動時就踢爆偉仔今年都不會接拍電影，現在多躲在家中或偶爾買菜做飯，電眼型男原來私底下是個住家宅男，但嘉玲仍不忘大讚老公是個浪漫的人！
昨晚珠寶腕錶品牌Van Cleef & Arpels舉行「Alhambra珍品展」活動，特別請來女星劉嘉玲前來鑑賞，其他出席嘉賓還有模特兒Jocelyn和老公Anthony、Amanda S.、英國名模Chole Frankie Peers、皮草太子爺王大業等。其中嘉玲穿上吊帶連身裙，並佩戴逾百萬元的品牌珠寶首飾現身，明艷照人！問她可有收藏珠寶首飾？她笑言每個女孩子都喜歡珠寶，那老公梁朝偉可有贈送？她甜笑說：「咁佢應該送，但作為女仔應該自己買畀自己。（偉仔送過畀你最有心思嘅係乜？）有好多嘢唔係用錢去衡量，係心意，佢有心思過我！」她又大讚老公是個浪漫的人：「佢都算浪漫，但有時都幾悶，但佢一浪漫少少我已經感動好耐，可能佢平時唔係好識做；其實做女人好簡單好易感動，係好感性！」
今年休息唔接戲
嘉玲又透露自己的電影《過界》將會於康城電影節參展，屆時會飛到當地，但偉仔就不會同行，她續說：「佢今年都唔會接戲，仲想休息，（咁你咪要陪佢？）佢又冇要求，其實偉仔算係咁，對我好好，畀我做自己鍾意嘅事，（咁佢自己鍾意做乜？）拍戲囉，如果唔使拍戲就喺屋企，（咁佢咪係宅男？）係o架，有時佢都鍾意去街市買餸，佢好搞笑，去親都戴晒口罩同帽，以為人哋唔認得佢，但次次都畀人認出。」
兩公婆詠春對「格」
嘉玲又表示偉仔動靜皆宜，閒時愛打詠春和看書，由於家中安裝了木人椿，故她也會跟老公「格」一下，她笑說：「我唔識詠春，不過我自己都想學，因為詠春可以強身健體。」談到影帝周潤發被指保養得宜回春？嘉玲即說：「發哥玩詠春o架，（咁你點保養？）我自己會做吓運動，玩吓瑜伽！」
文：名人組