歌手泳兒昨日到電台宣傳新歌，自爆因貪靚自薦在水底拍攝MV：「喺水底效果有意境啲，又想試未試過嘅嘢。」識游水的泳兒自嘲不懂「踩水」，通宵拍攝，浸水浸足四個鐘，不小心「濁親」飲了幾啖水。
問泳兒會否效法師姐蔡卓妍（阿Sa）參加跳水比賽？她大感興趣，說有機會不介意一試：「雖然我有畏高，但會做足安全措施。（有報道話阿Sa跳水傷腰，驚冇BB生？）有教練睇住，好多跳水員都有得生BB啦，不過希望阿Sa小心為上。」
