馬賽被盜3000蚊 印傭罪成入獄

無綫藝人馬賽於上月26日遭今年1月新聘用的女印傭（Ana Nurhasanah），連續兩日私自用其銀行提款卡盜取港幣3000元，該印傭昨於觀塘法院承認兩項盜竊罪，並求情指為家鄉5歲兒子的醫藥費才犯案，最終被判入獄1個月及賠償3000元。馬賽指當日發現銀行戶口無故被提取2000元，翌日再少1000元，原以為是網上e-banking出錯，向銀行查詢後才驚覺「唔對路」，於是向印傭查問，但卻遭對方連聲否認，馬賽惟有報警求助，結果警方在印傭睡房床褥下搜到涉案提款卡將她拘捕。

再搜出數萬元「賊贓」

至於印傭如何得知其銀行提款卡密碼，馬賽透露原本當對方家人般看待，更曾將密碼告知對方，可謂又傻又天真！她說：「我好信任佢，因為我一個人喺香港就係同佢住，我哋好close，我自己忙拍劇，所以曾經叫佢幫我撳錢，我覺得佢好乖、好純，所以之後冇改密碼，發生呢件事我都好失望、好唔開心，我真係當佢家人咁。」她透露除了銀行的3000元被盜外，警方之後更在印傭房間的櫃和喼內搜出屬於馬賽的名錶、衫及化妝品等，總值港幣數萬元。

心情低落的馬賽坦言難以接受事實，更一度為此事落淚：「我覺得好心寒，因為表面上我哋關係好好，佢好關心我、好錫我，但我問佢好多次都唔認。我會等佢出番嚟，約agent再同佢傾。（仲會否繼續聘用對方？）睇下佢態度先，我相信佢本性唔壞，只係一時受到誘惑，一念之差先咁做。」

馬賽續說：「如果佢肯改過自新嘅話，我會考慮繼續請番佢，因為佢廿幾歲好後生，我知佢喺印尼有個仔，依家佢留有案底，未必搵到新工。」不過，她指家人與經理人都擔心對方會向她報復，因此要先說服家人。

原僱主可聘犯事外傭

對此，本報分別致電僱傭中心及黃國桐律師查詢，雖然前者表示入境署會將犯案外傭列入黑名單，但黃國桐律師則謂若僱主提出申請，入境署或有機會批核簽證予有案底的外傭來港工作，他解釋：「因為原僱主清楚嗰位外傭嘅犯罪紀錄，但如果新僱主就好難批，除非新僱主清楚知道晒個外傭紀錄。」另外，一般發卡機構於條款中列明不得將提款卡轉借他人，否則有任何損失發卡機構將不負責任。

文：影視組

案件編號：KTCC2313/2013