城城嫌（石肯）腳：夾硬著會流血

舞台王者兼金馬影帝郭富城與名模熊黛林自06年開始撻着，但Lynn的「城嫂」地位似有還無，城城一直採取拖字訣，始終未肯給予名分，早前突爆兩人七年情玩完，更一度有傳無綫小花苟芸慧介入！Lynn戴上「分」戒兼認單身，「失城」後強顏歡笑，而個性灑脫的城城心情仍大靚，連日來出席活動均表現風騷，完美演繹「大丈夫何患無妻」的氣慨。

不會出家做和尚

原來城城毅然斬情絲，可能與好友楊采妮有關！去年城城接拍楊采妮處女執導作《聖誕玫瑰》，電影描述人性鬥爭，也令他心靈受到不少衝擊，城城日前接受專訪時表示電影令他想法有變，希望所有人都能解開心結，覺得「唔應該活喺唔合適嘅狀態入面」，他更發表「着鞋論」比喻感情，暗示Lynn這位32歲、上圍33C名模「唔啱着」，令他刮腳又流血，故決定「除鞋」互相放生：「好似一對鞋唔啱着，成日腳唔舒服，你都會想換過一對舒服啲嘅鞋，我哋每日都要行路，就好似身邊嘅伴侶，應該搵對合適嘅先着上去，起碼唔會住自己，夾硬着落去只會流血，傷口又愈合唔到，搵過另一對可能仲好，感情世界都係咁諗！」

熊黛林抵港後步出閘口，邊行邊講電話。

城城表示要換過對舒服的「鞋」走他的路。

城城繼續以連環佛偈解讀「勉強冇幸福」，認為「放低比執着」情操更高，只是未知Lynn是否聽得入耳：「人有灰色思想令自己迷失，如果能夠為對方諗吓，希望對方活得更加好，呢種係釋放，個個都係咁諗嘅話，世界一定和平。」雖然如此豁達看化世情，但篤信佛學的城城自覺未夠偉大，絕不會出家做和尚，但認為佛理令他能分辨對錯，並懂得將傷悲化作力量。

斷言傷心不落淚

提到片中一場喪父喊戲演得收放自如，城城表示沒有投放個人情感，純以角色角度出發，並直言真正的他絕不會喊：「我係個好堅強嘅人，就算點傷心都唔會流一滴眼淚，會壓抑喺心入面，只會喺電影入面釋放。」他又讚楊采妮首次執導功架十足，而以性侵犯作為電影題材更是充滿商業性，大讚她醒目。

攝影：林楠

化妝：Ian Wong＠ii Salon

髮型：Hetty Kwong

服裝：I.T、Diesel

場地：深圳觀瀾湖

文：影視組