楊紫瓊露口風大搞婚禮
國際巨星楊紫瓊早前終於答應法籍未婚夫Jean Todt的求婚，昨日她出席活動時露口風，大談婚禮構思，但說婚禮難於今年舉行，不過總算十畫有一撇，嫁杏有期。
楊紫瓊（Michelle）昨日以一身黃色連身裙打扮出席護膚品活動，將成為新娘子的她分外明艷照人。同場還有霍震寰太太霍陳琪琪及太子珠寶鐘錶主席鄧鉅明太太鄧宣宏雁等。問到婚禮的籌備情況，Michelle坦言日子仍未落實，她說：「努力同未婚夫夾緊時間，我哋想搵個有意思嘅日子。（相識紀念日？）都有諗過，但想再搵個特別日子。（想冬季定夏季？）未知。」
朋友時間難夾
不過，Michelle稱今年將要到六個國家為路道安全宣傳，所以難於度期結婚，她無奈說：「今年成事真係好難。（會唔會停咗電影工作？）主要係睇有冇好劇本同導演，嚟緊有個東南亞好大型嘅計劃，套電影籌備中。」雖然好日子未定，但Michelle揚言一定會在家鄉馬來西亞舉行婚禮，並想法多多：「我父母都喺嗰邊，如果匿埋搞佢哋會好傷心，不過婚禮要請好多人，分分鐘喺唔同地方要擺一次酒，或者一次過去某個地方大搞，但朋友嘅時間好難夾。（叫父母幫你搞？）婚禮梗係要自己搞。」
非洲宣傳返港
另外，她透露剛為路道安全宣傳從非洲返港，並分享當地見聞：「好心痛，當地有六成嘅人係路道意外而入醫院，有個老人家瞓喺醫院無人理，因為冇錢就唔會醫。」問到早前Michelle為馬來西亞總理納吉布拉票，而遭當地人指摘她為傀儡，又聲言要罷看其電影，大會公關即時為她擋駕，不過Michelle就大方回應：「我今次係為品牌宣傳，至於政治方面嘅問題，我喺馬來西亞已經講晒。（以後避談？）識我嘅人都知我好直，有嘢就會講。」
文：名人組